АҚШ ва Эрон можаросида сулҳ муддати яна чўзилди

АҚШ президенти Дональд Трамп 22 апрель, чоршанбага ўтар кечаси, 8 апрель куни эришилган ўт очишни тўхтатиш келишувининг амал қилиш муддати тугаши керак бўлган пайтда, Эрон билан урушдаги сулҳ “Покистон ҳукумати илтимосига кўра” узайтирилганини маълум қилди.

“Эрон ҳукуматида жиддий бўлиниш юзага келгани, бу эса кутилган ҳолат эканини ҳисобга олиб, шунингдек, фельдмаршал Осим Мунир (Покистон Қуролли кучлари қўмондони — таҳр.) ва Покистон бош вазири Шаҳбоз Шарифнинг сўровига биноан, биздан уларнинг етакчилари ва вакиллари ягона таклиф ишлаб чиққунга қадар Эронга ҳужумни тўхтатиб туриш сўралди”, — деб ёзди Трамп Truth Social ижтимоий тармоғида.

АҚШ президентининг айтишича, ўт очишни тўхтатиш тартиби “уларнинг таклифи тақдим этилгунига ва музокаралар ҳар қандай ҳолатда якунлангунига қадар” амал қилади. Шу билан бирга, Трамп АҚШ армиясига Ҳўрмуз бўғозидаги блокадани давом эттириш ва “барча бошқа жиҳатларда жанговар шайликни сақлаб туриш” бўйича топшириқ берганини таъкидлади.

Трампнинг бу баёноти эълон қилинишига бир соатча қолганида, Эроннинг Tasnim давлат ахборот агентлиги мамлакат, олий раҳбар Мўжтабо Хоминаийнинг АҚШ билан музокараларни давом эттиришга рухсат берганига қарамай, ОАВ хабарларига кўра 22 апрель куни Исломободда ўтиши керак бўлган муҳокамаларнинг иккинчи босқичида иштирок этишдан батамом воз кечганини ёзди.

Хабарда айтилишича, Теҳрон вакиллари бу қарорни Покистондаги воситачи орқали АҚШ томонига етказган. Эрон томонининг таъкидлашича, музокараларда иштирок этиш “вақтни беҳуда сарфлаш” бўлар эди, чунки АҚШ “ҳаддан ташқари талаблар” қўймоқда ва “ҳар қандай оқилона келишувга эришишга тўсқинлик қилмоқда”.

Бундан ташқари, бундан бир неча соат олдин Axios портали мухбири Барак Равид манбага таяниб, АҚШ вице-президенти Жеймс Дэвид Вэнснинг Исломободга сафари номаълум муддатга қолдирилганини маълум қилди. Вэнс АҚШнинг Эрон билан музокараларининг биринчи босқичида Америка делегациясига бошчилик қилган эди. Оқ уй ҳам бу ташриф бекор қилинганини тасдиқлади.

АҚШ ва Эрон ўртасидаги дастлабки тўғридан тўғри музокаралар Покистон пойтахтида сулҳга эришилганидан бир неча кун ўтиб бўлиб ўтган. Америка делегацияси таркибида Вэнсдан ташқари, жумладан, Оқ уй раҳбарининг махсус вакили Стивен Уиткофф ва Трампнинг куёви Жаред Кушнер ҳам бўлган.

Эрон делегациясига эса парламент спикери Муҳаммад Боқир Ғолибоф ва ташқи ишлар вазири Аббос Арағчи бошчилик қилган.

Музокаралар муваффақиятсиз якунланган. Орадан бир кун ўтиб, Трамп Ҳўрмуз бўғозини блокада қилиш бошланганини эълон қилди, Эрон эса кейинроқ АҚШни сулҳни бузишда айблади.