Трамп: Путин G20 саммитига келса, фойдали бўлади

АҚШ президенти Дональд Трамп 2026 йил декабрь ойида Майамида бўлиб ўтадиган “Катта йигирматалик” — G20 саммитида россиялик ҳамкасби Владимир Путиннинг иштирок этиши “фойдали” бўлади, деб ҳисоблайди. Шу билан бирга, у Россия ушбу саммитга таклиф қилингани ҳақида билмаслигини ва Путин унда иштирок этишига шубҳа қилишини 23 апрель, пайшанба куни маълум қилди.

Аввалроқ шу куни The Washington Post газетаси Дональд Трамп Владимир Путинни бўлажак “йигирматалик” саммитига таклиф қилиш ниятида эканини хабар қилган эди.

AFP агентлигига кўра, шу орқали АҚШ президенти Россия 2022 йилда Украинага бостириб кириши оқибатида дуч келган халқаро яккаланишни “янада юмшатиш” бўйича саъй-ҳаракатларини давом эттирмоқчи.

Бироқ Россия президенти матбуот котиби Дмитрий Песков Путиннинг G20 саммитида иштирок этиши бўйича қарор ҳали қабул қилинмаганини билдирди.

Россиянинг РИА “Новости” агентлиги РФ ташқи ишлар вазири ўринбосари Александр Панкинга таяниб, Москва “энг юқори даражада иштирок этиш” учун таклиф олганини ёзди.

“Аммо сана яқинлашганда кўрамиз. Унгача нима бўлишини худо билади”, — дея дипломат сўзларини келтиради журналистлар.

Аввалроқ Дональд Трамп Майамидаги саммитда иштирок этиш учун Ўзбекистон ва Қозоғистон етакчиларини таклиф қилганини айтган эди.