"Синглимни хўрлашган": Сирдарёдаги мудҳиш қотиллик ҳақида репортаж

Сирдарёнинг Ширин шаҳарчасида 29 ёшли аёл ва унинг 5 яшар қизи эркакнинг норасмий хотини томонидан пичоқланиш оқибатида вафот этди. Марҳуманинг яқинлари аёлнинг узоқ йиллар давомида оилада руҳий ва жисмоний босимга учраганини билдириб, эркакка ҳам жазо талаб қилишмоқда.

Марҳума Бекободдан Сирдарёга турмушга чиққан ва тўрт фарзанди бўлган. Унинг яқинларига кўра, аёл турмуш ўртоғи билан 9 йил бирга яшаган даврида оиласи нотинч бўлганини, қайнона ва турмуш ўртоғи томонидан мунтазам хўрланганини айтган.

Синглимни хўрлашган...

Малика Жумабоева, марҳуманинг опаси:

 “Охирги пайтлар қаттиқ йиғларди, “яхши бўлармикан, чидолмаяпман” дерди. У аёл бемалол уйига бориб юрган, қариндошлари буни билган, уни ҳурмат қилишган – синглимни эса хўрлашган. Шунча фарзандларни туғиб катта қилсаям ҳурмат топмади у. Қайнонаси намоз ўқиб ўтиргандим деяпти, уч кишини пичоқлагунча қандай билмаслиги мумкин? Уйида катта овсинининг боласиям бўлган.

Ўша куни ўша қиз билан улар кафеда ўтириб ичишган экан, жанжал бўлган. Ўзи олдиндан таҳдид бўлган синглимга “оилангни қачондир йўқ қиламан” деган. Буни бизга айтмади, кейин эшитдик”.

Пичоқланган қизалоқларнинг каттаси 5, кичиги 3 ёшда бўлган. Она ва 5 яшар қиз воқеа жойида вафот этган. 3 ёшли қизалоқ айни пайтда шифохонанинг жонлантириш бўлимида.

Куёвни оталик ҳуқуқидан маҳрум қилиш керак

Мавлуда Абдуназарова, марҳуманинг аммаси:

“Энг аввало куёвда айб. Нима учун у ташқарида юрибди? Нима учун унга жазо қўлланмаяпти? Болаларнинг қотили, энг аввало шу ўлдирган аёл бўладиган бўлса, куёв ўшанинг ишончига кирган, ваъдаларни берганки шу аёл шу даражагача борган? Дарвозаданмас, орқа тарафдан кириб жияним уй ишларини қилиб ўтирган жойида уни урган. Қизчалари дод солганда уларни мажағлаб ташлаган, ичакларини чиқариб. Чақалоқ уйда ухлаб ётган, қайнонаси уйда намоз ўқиётган эдим деди. Наҳотки шу бақир-чақирларни эшитмаган? Ҳаммаси билар экан, борди-келди қилар экан.

Жиянимни бу ерга олиб келиб ташлаб, ҳаммаси билан апоқ-чапоқ бўлиб юришган. Шунақа экан, Мафтунани жавобини бериб, ўшанга уйлантириб қўймайдими? 20 кунлик чақалоқ қолди, шифохонада 3 яшар боланинг ичагини 3 соат ювиб жойига жойлаштирибди врачлар. Агар бунга одилона чора кўрилмаса, бунақалар кўпаяди. Куёвни оталик ҳуқуқидан маҳрум қилиш керак. Ўз оиласини, хотинини, ўз болаларини ўлдирган отанинг ҳаққи йўқ болаларга ота бўлишга”.

Ичим тугаб бўлди менинг...

Ғофур Жумабоев, марҳуманинг отаси:

 “Қизимнинг дарди ичида кетди. Охирги пайтлар келарди, дадамга айтманглар дер экан. Куёв келиб ташлаб кетарди, кетиши чўзилиб кетарди, ҳайрон бўлиб “уйинг тинчми?” десам, ўзиям хижолат бўларди. Мен рангидан билардим. Ота-онам ўйланмасин деб, қўни-қўшни гапирмасин деб бошқача ўтирарди эрини кутиб. Дардини ўқиб турардим қизимни. Ичим тугаб бўлди менинг.

Бир-икки марта куёвни алоҳида чақириб ўтирғизиб айтганман, қилиқларини билардим. Лекин унга гапирсангиз сизни эшитмасдан, хаёли бошқа жойда ўтирарди. Сабабини билмайман, бирор нарса истеъмол қиладими деб ўйлардим”.

Олий суд ахборот хизмати ҳолат юзасидан қотилликда гумонланаётган аёл Жиноят кодексининг 97-моддаси билан қамоққа олинганини маълум қилди. Айни пайтда аёл тергов ҳибсхонасида сақланмоқда.