Путин Шрёдерни музокарачи сифатида таклиф қилди

Германия ҳукумат коалицияси Германия президенти Франк-Вальтер Штайнмайерни Россия билан Украинадаги урушни тугатиш бўйича эҳтимолий тинчлик музокараларида Европа Иттифоқи вакили сифатида қатнашиши мумкин бўлган номзод сифатида кўриб чиқмоқда.

Фото: AP

Бу ҳақда 10 май куни Германия ҳукуматига яқин манбаларга таяниб Der Spiegel журнали хабар берди.

Нашр суҳбатдошларининг айтишича, Германия ҳукумат коалицияси Россия президенти Владимир Путиннинг собиқ Германия канцлери Герхард Шрёдерни Европа Иттифоқи номидан музокарачи этиб тайинлаш таклифини қўллаб-қувватлаши эҳтимолдан йироқ.

Берлинда Шрёдер бундай вазифани якка ўзи бажара олишига ишонч билдирилмаётгани айтилмоқда.

Der Spiegel маълумотига кўра, Шрёдер ва Франк-Вальтер Штайнмайердан иборат “воситачилик дуэти” Германия пойтахтида “қизиқарли вариант” сифатида баҳоланмоқда.

Аввалроқ Reuters, Süddeutsche Zeitung, Der Spiegel ва бошқа немис ОАВ ҳукумат коалициясидаги манбаларга таяниб, Германия ҳукумати Путиннинг Европа Иттифоқи номидан музокараларда Шрёдер иштирок этиши ҳақидаги таклифини рад этгани ҳақида хабар берган эди. Шрёдер Россия президенти билан кўп йиллик дўстона муносабатлари билан танилган.

9 май куни Владимир Путин Кремль журналистлари билан матбуот анжуманида Шрёдерни Россиянинг Украинага қарши уруши бўйича музокараларда Европа Иттифоқидан “энг мақбул” номзод деб атаган.

Бу орқали у Ғарбий Европада ўзи мулоқот қилишга тайёр бўлган сиёсатчилар бор-йўқлиги ҳақидаги саволга жавоб берган.

Шундан кейин Путин Россия мулоқот учун очиқ эканини, аммо Европа “бизга нисбатан турли ҳақоратли гапларни айтмайдиган” музокарачини танлаши кераклигини билдирган.

Путиннинг сўзларига кўра, Россия Европа Иттифоқи билан “доимо” ҳурмат билан мулоқот қилиб келган.

Айни пайтда Россия ва Украина ўртасида расмий музокаралар олиб борилмаяпти. Буни апрель ўртасида Россия ташқи ишлар вазири Сергей Лавров ҳам тасдиқлаган.

Der Spiegel манбаларига кўра, Германия ҳукумати Путин таклифини ишончли деб ҳисобламаяпти, чунки Россия ҳозирча муроса қилишга тайёрлигини намоён этмаган.

Шу билан бирга, нашр суҳбатдошлари Кремль ҳақиқатдан ҳам Украинадаги урушни тугатишни истаяптими-йўқми, буни текширишнинг бир усули сифатида Россиянинг уч кунлик ўт очишни тўхтатиш режимини узайтиришга тайёрлиги кўрилиши мумкинлигини айтган.

AFP агентлигига гапирган Германия ҳукуматига яқин манба эса Путин баёноти “сохта таклифлар қаторига киради” ва Россиянинг Европани бўлишга қаратилган гибрид стратегиясининг бир қисми эканини таъкидлаган.