Ориф Бўтаев чорвачилик ва яйлов хўжалигига масъул бўлди

Ветеринария ва чорвачилик қўмитаси – Чорвачилик ва яйлов хўжалигини ривожлантириш агентлиги сифатида қайта ташкил этилди. Агентлик бундан кейин ҳам Қишлоқ хўжалиги вазирлиги ҳузурида фаолият юритади.

Президент қарори билан, Ориф Алибоевич Бўтаев қишлоқ хўжалиги вазири ўринбосари – Чорвачилик ва яйлов хўжалигини ривожлантириш агентлиги директори лавозимига тайинланди.

У 2020 йил февралидан буён Микрокредитбанк бошқаруви раиси лавозимида ишлаб келаётган эди. Бундан аввал Саноатқурилишбанк бошқаруви раисининг биринчи ўринбосари бўлиб ишлаган.

Ориф Бўтаев 2025 йил август ойида “Содиқ хизматлари учун” медали билан тақдирланган.

Маълумот учун, 2025 йил октябр ойида имзоланган президент қарорига асосан, яйлов ерларини тиклаш бўйича Осиё тараққиёт банк иштирокида 63 млн долларлик лойиҳа доирасида:

• маҳаллий аҳоли уй шароитида боқадиган чорва молларини озиқлантириш учун жамоат яйловларини ташкил этиш;
• республикада мавжуд яйлов ерларини тўлиқ хатловдан ўтказиш;
• яйлов ерлари ҳолати ва инфратузилмасини тиклаш, хусусан, суғориш қудуқларини қазиш;
• яйлов ерларда ўсимлик турларини кенгайтириш, замонавий технологиялар (дронлар)дан фойдаланган ҳолда уруғ сепиш каби чоралар белгиланган.

Республика бўйича чорвачиликка ихтисослашган 200 та маҳалла рўйхати тузилиб, уларга ветеринарлар жалб қилиниши ҳам кўзда тутилган.