Киевга йирик ҳужум: камида 21 киши ҳалок бўлди

Россия қўшинларининг Киевга ракета ва дронлар ёрдамида уюштирган оммавий ҳужуми оқибатида камида 21 киши ҳалок бўлди. Қурбонлар орасида уч нафар бола ҳам бор. Украина пойтахтида 15 май мотам куни деб эълон қилинди.

Фото: picture alliance

Украина Давлат фавқулодда вазиятлар хизмати маълумотига кўра, ҳужум оқибатида камида 47 киши жароҳат олган, уларнинг икки нафари болалардир. Киев шаҳар ҳокими Виталий Кличконинг билдиришича, жабрланганлардан 27 нафари шифохоналарга ётқизилган.

Киевнинг жануби-шарқидаги Дарницкий туманида кўп қаватли турар жой биносининг бир қисми қулаган. Қутқарувчилар вайроналар орасидан 28 кишини тирик олиб чиққан.

Шу муносабат билан 15 май куни Киевда мотам эълон қилинди. Бу куни шаҳардаги барча коммунал биноларда давлат байроқлари туширилади. Давлат ва хусусий ташкилотларга ҳам байроқларни тушириш тавсия этилган. Шунингдек, барча кўнгилочар тадбирлар тақиқланган.

Украина ташқи ишлар вазири Андрей Сибиха Россиянинг мазкур ҳужуми муносабати билан БМТ Хавфсизлик кенгашининг фавқулодда йиғилишини чақириш ташаббуси билан чиққанини маълум қилди.

Унинг таъкидлашича, Россиянинг Украина фуқаролари ва гуманитар ходимларга қарши ҳаракатлари халқаро ҳамжамиятнинг кескин муносабатини талаб қилади.

Ҳужум натижасида Киевнинг турли ҳудудларида ёнғинлар ва вайроналар кузатилди. Днипро туманида дрон парчалари беш қаватли уй томига тушиб, ёнғин келиб чиққан. Шунингдек, хусусий уй ҳам дрон зарбасига учраган.

Шаҳарнинг шимолида эса дрон бўлаклари кўп қаватли уйнинг 12-қаватидаги хонадонга тушиб, ёнғин келтириб чиқарган.

Шевченко, Соломенский ва Оболон туманларида нотурар бинолар шикастланган. Соломенский туманида бизнес марказ ёнидаги автотураргоҳда автомобиль ёнган. Дарницкий туманида эса кичик савдо иншоотлари ва ёқилғи қуйиш шохобчасида ёнғин чиққан.

Киевнинг Голосеевский туманида дрон бўлаклари бизнес марказ ва автомобиль йўлига тушган.

Украина Қуролли кучлари ҳаво кучлари маълум қилишича, Россия томонидан бошқа ҳудудларга ҳам ракета, дрон ва бошқариладиган авиация бомбаларидан фойдаланилган. Хусусан, Харкив, Полтава, Суми, Донецк, Одесса, Миколайив, Днипропетровск ва Черкасси вилоятлари ҳужумга учраган.

Украина томонининг билдиришича, 13 майдан аввалги бир сутка ичида Россия армияси Украина бўйлаб 892 та дрон учирган. Уларнинг 710 таси ҳаво ҳужумидан мудофаа тизимлари томонидан йўқ қилинган.

Шу билан бирга, Карпаторти вилояти маркази бўлган Ужгород шаҳри ҳам уруш бошланганидан бери илк бор ҳужумга учрагани айтилди.