Ўқувчини урган ўқитувчи воқеасига расмий баҳо берилди

Тошкентдаги 275-мактабда ўқитувчи 9-синф ўқувчисини калтаклагани юзасидан давлат ўз позициясини эълон қилди.

Бу позицияга кўра, ўқувчи ўз ҳаракатлари билан ўқитувчини қўл кўтариш даражасига олиб борган деб топилди.

Ўқитувчига нисбатан қўзғатилган жиноят иши тугатилиб, ўқувчининг ота-онаси маъмурий жавобгарликка тортилди.

Ички ишлар вазирининг биринчи ўринбосари Рустам Жўраев воқеа юз берган мактабга бориб, ўқитувчиларга мурожаат қиларкан, педагоглар “президент ва администрация раҳбариятининг ҳимоясида” эканини айтди.

“Сизларнинг орқаларингизда армия бор, погонлилар бор, генераллар бор”, деди Жўраев.

Нима бўлганди?

19 май куни Мирзо Улуғбек туманидаги 275-мактабнинг 9-синфида Р.Р. исмли ўқувчи (йигит, 2010 й.т.) ва информатика ўқитувчиси Зокир Норбой ўғли Омонов (2002 й.т.) ўртасида жанжал чиққан. Интернетда тарқалган, синфдаги бошқа ўқувчилар томонидан олинган видеоларда ўқитувчи ўқувчини калтаклаганини кўриш мумкин.

Расмийларга кўра, жанжал келиб чиқишига – ўқувчи дарсга халақит бергани сабаб бўлган. Пойтахт ИИББнинг 21 май куни эълон қилинган бирламчи ахборотига кўра, ўқитувчи ўқувчига тан жароҳати етказган, натижада жабрланувчи тиббий ёрдам учун шифохонага мурожаат қилган.

Ҳолат юзасидан ўқитувчига нисбатан Жиноят кодексининг 105-моддаси (“Қасддан баданга ўртача оғир шикаст етказиш”) билан жиноят иши қўзғатилиб, тергов бошланган эди.

Жиноят иши тугатилди

25 май кунги матбуот анжуманида ички ишлар вазирининг матбуот котиби Шоҳрух Ғиёсов мазкур жиноят иши тугатилгани, қўшимча маълумотлар кейинроқ эълон қилинишини айтди.

26 май куни бир қатор ярим расмий Telegram-каналларда текширув якунлари бўйича видеорепортаж эълон қилинди. Шундай постлардан бирини Мактабгача ва мактаб таълим вазирлиги ҳам ўз каналида улашди.

Бу постларда мактабдаги воқеа “адолатли якун топгани” айтилади.

Ўқитувчи изоҳи

Репортажда синфхонадаги кузатув хонасидан олинган видеолавҳа жой олган. Ундан маълум бўлишича, дарс вақтида энг орқа партадаги ўқувчилардан бири қора футболкадаги (кейинроқ ўқитувчи томонидан калтакланган) бошқа бир ўқувчининг бошига дарс вақтида сув қуйган, бунга жавобан қора футболкадаги йигит ҳам ўрнидан туриб унга сув сепа бошлаган.

Шундан кейин ўқитувчи иккала ўқувчини эшик олдига чақириб, синфхонадан ташқарига чиқармоқчи бўлган ва қора футболкали йигит – Р.Р.нинг елкасидан ушлаган.

“Юринг, ташқарига чиқайлик деганимда, [сенсираб] “қўлингни ол” деди. Бир шапалоқ урдим. У иккита мушт отди менга. Оёғимдан ушлаб йиқитмоқчи... Эшикни тепиб, сўкмаган гапи қолмади. Менда бировни уриш ниятим бўлмаган; тўғри, қизишиб кетдим, фақат ўзининг жавобидан кейин шунақа вазият бўлиб қолди”, – дея воқеага изоҳ берган Зокир Омонов пойтахт ИИББ матбуот хизмати билан суҳбатда.

Бу ўқувчилар бўйича бошқа эътирозлар

275-мактаб ўқитувчиларига кўра, бу икки ўқувчининг хулқи аввалдан яхши бўлмаган.

“Мана шу иккита ўқувчи иштирокида бир неча маротаба жанжал ҳолатлари, агрессив ҳолатлар учраб турган. Бу ҳолатлар бўйича биз уларнинг ота-оналари билан ҳамкорликда ишлаб келганмиз, маълумот берилган, мактабга чақиртирилган”, – деган интервюда мактаб жамоаси вакилларидан бири.

Аёл педагоглардан бири кўзда ёш билан интервю бераркан, информатика дарсидаги 19 май кунги воқеадан бир неча аввал – 7 май куни худди шу болалардан бири уни қаттиқ ҳақорат қилганини айтади:

“Бу болалар олдин ҳам дарс ўтишимизга халақит қилган. Бола жуда агрессив ҳолатда: “қўлингни торт” деб, бирданига сенлашга ўтиб кетди. Орқасидан тўрт-беш марта сўкиш, ҳақорат сўзларини ишлатди. 20 йиллик стажимда ҳали бирон марта биронта ўқувчи сўкиб ҳақорат қилмаган”.

“Ортингизда армия бор, погонлилар бор, генераллар бор!”

Ички ишлар раҳбарлари иштирокида мактабда бўлиб ўтган йиғилишда Тошкент шаҳар ИИББ бошлиғи Равшан Султонхўжаев ўқитувчига нисбатан қўзғатилган жиноят иши батамом тугатилганини эълон қилган. Педагогик жамоа буни қарсаклар билан кутиб олган.

“Ҳар битта ўқитувчига нисбатан кўтарилган қўл, ҳақорат жавобсиз қолмайди. Фарзанднинг тарбиясига бевосита ота-она жавобгар”, – деган Султонхўжаев.

Ички ишлар вазирининг биринчи ўринбосари – Жамоат хавфсизлиги департаменти бошлиғи Рустам Жўраев йиғилишда бутун республика ўқитувчиларига мурожаат қилган:

“Бутун республиканинг ўқитувчилари эшитиши керак: сизлар муҳтарам президентимиз, администрация раҳбарияти ҳимоясидасизлар. Бутун Ўзбекистоннинг ўқитувчилари, ота-оналар, ўқувчилар билиши керак бу нарсани!

Сизларнинг орқаларингизда армия бор, погонлилар бор, генераллар бор!” – деган генерал Жўраев.