Россия ёнилғи экспортига янги чекловлар жорий этиши мумкин

Россия ҳукумати дизель ёқилғиси ва авиакеросин экспортини вақтинча чеклаш имкониятини кўриб чиқмоқда. Бу ҳақда “Интерфакс” ва РБК нашрлари манбаларига таяниб хабар берди.

Фото: IMAGO

Маълум қилинишича, Россия бош вазири ўринбосари Александр Новак ёнилғи бозоридаги вазият бўйича йиғилиш ўтказган. Унда ички бозор барқарорлигини таъминлаш ва соҳадаги компаниялар ҳамда давлат идоралари ҳаракатларини мувофиқлаштириш масалалари муҳокама қилинган.

РБК манбасига кўра, мазкур ташаббус ҳозирда Россия Иқтисодий ривожланиш вазирлиги билан келишилмоқда. Чекловлар бир ёки икки ой муддатга жорий қилиниши мумкин.

Йиғилиш якунларига кўра, нефть компанияларига нефт маҳсулотлари экспорт ҳажмини чеклаш тавсия этилган. Аввалроқ Россия 1 апрелдан 31 июлгача бензин экспортини тўлиқ тақиқлаган эди.

Нашрлар таъкидлашича, дизель ёнилғиси экспортига чекловлар 2023 йил сентябридан буён ички бозорни барқарорлаштириш мақсадида бир неча бор жорий этилган. Аммо авиакеросин экспортини чеклаш масаласи илк бор кўтарилмоқда.

Reuters агентлиги эса Украина дронлари ҳужумлари ортидан Россиянинг марказий қисмидаги деярли барча йирик нефтни қайта ишлаш заводлари қисман ёки тўлиқ ишини тўхтатганини хабар қилди.

Агентлик маълумотига кўра, ҳужумлар таъсирида тўхтаб қолган ёки ишлаб чиқаришни қисқартирган заводларнинг умумий қуввати йилига 83 миллион тоннадан ошади. Бу Россия нефтни қайта ишлаш қувватининг қарийб чорак қисмига тенг.