АҚШ: Исроил ва Ливан ўт очишни тўхтатишга келишди

Исроил ва Ливан АҚШ воситачилигида ўт очишни тўхтатиш бўйича келишувга эришди. Келишув шартларига кўра, «Ҳизбуллоҳ» тўлиқ ўт очишни тўхтатиши ва жангчиларини Литани дарёсининг жанубий ҳудудларидан олиб чиқиши лозим.

Фото: REUTERS

АҚШ Давлат департаменти 3 июнь куни Исроил ва Ливан ўртасида ўт очишни тўхтатиш режими бўйича келишувга эришилганини маълум қилди. Уч томонлама баёнотга кўра, келишув Вашингтонда икки кун давом этган музокаралар натижасида имзоланган.

Ҳужжатда таъкидланишича, келишувнинг амал қилиши «Ҳизбуллоҳ» томонидан ўт очишнинг тўлиқ тўхтатилиши ҳамда гуруҳ жангчиларининг Литани дарёсидан жанубдаги ҳудудларни тарк этишига боғлиқ. Шунингдек, Ливан армияси назорати остида бўладиган махсус пилот ҳудудлар ташкил этилиши кўзда тутилган.

Баёнотга кўра, 22 июнь ҳафтасида Ливан ва Исроил қолган баҳсли масалаларни ҳал қилиш ҳамда кенг қамровли келишувга эришиш мақсадида тўғридан тўғри музокараларни давом эттиради.

Можаронинг янги босқичи АҚШ ва Исроилнинг Эрон билан уруш бошлаганидан кейин кучайди. Март ойи бошидан «Ҳизбуллоҳ» Эрон олий раҳбари Али Хоманаийнинг америкалик ва исроиллик кучлар зарбалари натижасида ҳалок бўлганига жавоб сифатида Исроилга ракета ҳужумларини қайта бошлади.

Бунга жавобан Исроил ҳарбий-ҳаво кучлари Ливан ҳудудига, жумладан, пойтахт Байрутга қарши кенг кўламли зарбалар берди. Шу билан бирга, Исроил Литани дарёси билан ўз чегараси ўртасида буфер ҳудуд яратиш мақсадида жанубий Ливанда қуруқлик операциясини бошлади.

Ливан Соғлиқни сақлаш вазирлиги маълумотларига кўра, жанглар ва бомбардимонлар оқибатида 2200 га яқин киши ҳалок бўлган. Исроил армияси эса март ойидан буён 1700 дан ортиқ «Ҳизбуллоҳ» аъзоси ўлдирилганини маълум қилган.

1 июнь куни Axios нашри Дональд Трамп Исроил бош вазири Биньямин Нетаньяҳуни Байрут жанубига зарба бериш буйруғи учун телефон орқали қаттиқ танқид қилгани ҳақида хабар берган эди. Шундан сўнг Теҳрон Вашингтон билан урушни тугатиш бўйича музокараларни тўхтатишини маълум қилди.

Бироқ Трамп бу маълумотларни рад этиб, музокаралар жадал суръатларда давом этаётганини таъкидлади. У Truth Social тармоғида Исроил ва Ливан ўртасида ўт очишни тўхтатиш бўйича келишувга эришилгани ва бу қадам музокараларни сақлаб қолишга хизмат қилганини ёзди.