«Орешник» ҳали жанговар қўллангани йўқ – Путин

Россия президенти Владимир Путин 4 июн куни Санкт-Петербург халқаро иқтисодий форуми чоғида бир гуруҳ хорижий журналистларнинг саволларига жавоб қайтарди. 

Форумнинг биринчи кунида Украина дронлари Санкт-Петербург ва Ленинград области бўйлаб зарба берди, натижада Болтиқбўйи минтақасидаги энг йирик нефт терминалларидан бири бўлган Петербург нефт терминалида ёнғин бошланди. Шаҳар узра қора тутун устунлари кўтарилди – бу манзара форум ўтказилаётган ҳудуддан яққол кўриниб турарди.

Бундан ташқари, Украина қуролли кучлари Россиянинг «Кронштадт денгиз заводи»даги Алексеев докида турган «Бойкий» ҳарбий кемаси аниқ нишонга олинганини маълум қилган. Сунъий йўлдош орқали олинган тасвирларда кемада ёнғин рўй бергани акс этган.

Матбуот анжумани чоғида Аssociated Рress агентлиги журналисти Жеймс Жордан Путиндан Санкт-Петербург бўйлаб зарбалар ҳақида сўраш асносида Россия иқтисодиёти сўнгги вақтларда муаммоларни бошдан кечираётгани, президентнинг рейтинги қулаётгани, «АҚШ эса босқинни стратегик фалокат деб атагани»ни (у давлат котиби Марко Рубионинг яқинда берган баёнотини назарда тутган) эслатган.

«Буларнинг барчасини ҳисобга оладиган бўлсак, бутун Донбассни эгаллашга қаратилган ҳарбий мақсадингизга амал қилиш мантиқан тўғри бўладими ёки сиз келишувга боришга тайёрмисиз?» – дея савол қўйган журналист.

Путин Жорданнинг саволини юзда табассум билан тинглаб турди ва бунга жавобан Донбассни назорат остига олиш музокаралар ғоясига зид эмаслигини айтди. Шунингдек, у Украинада Россиядаги каби ҳаво ҳужумидан мудофаа тизимлари ҳам, зарбдор ракета тизимлари ҳам йўқлигини айтди.

«Ғарбдаги ҳомийлар турли хил, жумладан, узоқ масофали дронларни кўп миқдорда етказиб бермоқда. Афсуски, улардан баъзилари ёриб ўтмоқда, аммо Россияда ҳаво ҳужумидан мудофаа тизимлари мавжуд. Ҳа, биз уни такомиллаштиришимиз керак. Ҳа, биз уни мустаҳкамлашимиз керак ва биз буни амалга оширамиз, аммо Украинада умуман бундай тизим йўқ», – деган Путин.

У «Россия қўшинлари бутун фронт бўйлаб ҳужум қилаётгани», Украина эса «шахсий таркиб етишмовчилиги»ни бошдан кечираётгани ҳақидаги даъволарини яна бир бор такрорлаган:

Россия қўшинлари бутун фронт чизиғи бўйлаб ҳужум қилмоқда. Украина қуролли кучларида шахсий таркиб бўйича ҳалокатли етишмовчилик юзага келган: ойлик йўқотишлар 40 минг, мажбурий сафарбарлик 15-16 минг киши беради, қаердадир 14 минг киши госпиталлардан қайтарилади. Яъни ҳар ойда минус 10 минг киши. Яна ойига 20 минг киши дезертирлик қилади. Деярли расмий рақамлар: дезертирлик учун 200 минг жиноий иш очилган! Буларнинг барчаси кундалик режимда ҳудудлар бой берилишига олиб келади.

Матбуот анжумани чоғида Путин 24 май куни Украинага «Орешник» баллистик ракетаси билан йўлланган сўнгги зарбалар юзасидан ҳам изоҳ берди.

«Орешник» ракетаси билан Киев областининг Белая Церков шаҳрига зарба берилганди. Гувоҳлар томонидан олинган кадрларда ерга бир неча шулъа тушаётганини кўриш мумкин. Украина расмийлари ва ҳарбийлари таъкидлашича, битта «Орешник» билан Белая Церковдаги гаражлар кооперативига зарба берилган, иккинчи ракета эса оккупация остида бўлган ҳудудга тушган. Бу кенг кўламли уруш бошланганидан буён учинчи марта «Орешник» қўлланиши бўлди.

Россия президентининг айтишича, «Орешник» билан сўнгги зарбалар ҳақиқий муҳим нишонларга эмас, балки «натижаларни кўриш қулай бўлган» жойларга берилган.

«Сизга бир сирни очаман. Украина бўйлаб ҳали «Орешник» жанговар қўлланмади. Бу Белая Церковга ҳам, асосий мустаҳкамланган ҳудуд периметридаги ДХР ҳудудига ҳам тегишли. Кейин ўша зарба берилган омборхонага дронларимиз учиб борди – ва шунчаки блоклар қандай ётқизилганига қарадик. Қаерга тушган бўлса, ҳаммасини миллиметрларигача ўлчаб чиқишди», – деди Путин.

Путин ҳозир бундай зарбалар «келажакда „Орешник“ни белгиланган мақсадларда, шу жумладан шаҳар ҳудудида тўлиқ форматда қўллаш тўғрисида қарор қабул қилиш» учун зарурлигини айтди.

«Орешник» – ўрта масофали ракета (бошқа таснифга кўра – оралиқ, чунки унинг тахминий 5500 км масофаси қитъалараро масофага яқин келади) ҳисобланади. У олтитагача жанговар каллакни ўз ичига олиши мумкин бўлган бўлинадиган жанговар қисм билан жиҳозланган.