Ўзбекистон критик минераллар соҳасидаги халқаро ҳамкорликни кенгайтирмоқда

Ўзбекистон технологик металлар комбинати (ТМК) дунёнинг энг йирик тоғ-кон ва металлургия ҳолдингларидан бири – Shaanxi Non-ferrous Metals Holding Group корпорацияси билан ҳамкорлик меморандумини имзолади.

Маълум қилинишича, Shaanxi Non-ferrous Metals Holding Group молибден, титан, рангли металлар, геология, инжиниринг ҳамда тўлиқ саноат занжири бўйича жаҳон миқёсида етакчи ўринларни эгаллаб келаётган корпорацияларидан бири ҳисобланади. Бугунги кунда ҳолдинг таркибида 30 дан ортиқ корхона ва ташкилотлар фаолият юритиб, уларда 40 мингдан зиёд мутахассис иш олиб бормоқда. Корпорация геологик қидирув, конларни ўзлаштириш, қазиб олиш, бойитиш, металлургик қайта ишлаш, илмий тадқиқотлар, инжиниринг ҳамда юқори қўшилган қийматли маҳсулотлар ишлаб чиқариш йўналишларини қамраб олган интеграциялашган саноат тизимини шакллантирган.

Ҳолдинг таркибидаги Jinduicheng Molybdenum компанияси дунёдаги йирик молибден ишлаб чиқарувчилардан бири саналади. Шунингдек, корпорация таркибига аэрокосмик саноат учун титан ва титан қотишмаларини ишлаб чиқарувчи Baoti Group ҳам киради. Ушбу компания титан саноатининг глобал етакчиларидан бири ҳисобланади.

Ўзбекистон технологик металлар комбинати (ТМК) ва Shaanxi Non-ferrous Metals Holding Group ўртасида имзоланган меморандум геология-қидирув ишларини ривожлантириш, критик минералларни қазиб олиш ва чуқур қайта ишлаш, илғор технологиялар трансфери, илмий-тадқиқот фаолиятини кенгайтириш, мутахассислар тайёрлаш ҳамда истиқболли инвестиция лойиҳаларини амалга оширишни назарда тутади.

Мазкур ҳамкорлик Ўзбекистоннинг критик минераллар соҳасидаги салоҳиятини ошириш, халқаро ҳамкорликни кенгайтириш ва юқори қўшилган қийматли маҳсулотлар ишлаб чиқаришни ривожлантиришга хизмат қилади.

Реклама ҳуқуқи асосида