1991 йилгача қурилган 17 мингта уй реновация қилиниши мумкин

Ўзбекистонда 1991 йилгача қурилган 17 мингта турар жойни реновация қилиш ва улар ўрнида замонавий, энергия тежамкор ҳамда тўлиқ инфратузилма билан таъминланган кўп қаватли уйлар барпо этиш имконияти кўриб чиқилмоқда.

Президент Шавкат Мирзиёевга шаҳарсозлик ва уй-жой қурилиши соҳасини ривожлантириш бўйича тақдим этилган ахборотда республикадаги эски уй-жой фондини босқичма-босқич янгилаш масаласига алоҳида эътибор қаратилди.

Қайд этилишича, ҳозиргача шаҳарсозлик реновацияси жараёнларини тартибга солувчи ягона қонун мавжуд эмас эди. Шу муносабат билан реновация тўғрисидаги янги қонун лойиҳаси ишлаб чиқилган.

Лойиҳада реновация ҳудудларини белгилаш, аҳоли розилигини олиш, компенсация ва кўчириш тартиблари, инвесторлар мажбуриятлари ҳамда давлат органлари ваколатларини аниқ белгилаш назарда тутилган.

Таъкидланишича, реновация дастурлари орқали эскирган уй-жой фондини янгилаш, аҳоли учун хавфсиз ва қулай яшаш шароитларини яратиш, муҳандислик-коммуникация тармоқларини модернизация қилиш, шунингдек, яшил ҳудудлар ва ижтимоий инфратузилмани кенгайтириш мақсад қилинган.