Зеленский G7 саммитида Трамп билан учрашишини маълум қилди

Украина президенти Володимир Зеленский АҚШ президенти Доналд Трамп билан Францияда бўлиб ўтадиган «Катта еттилик» (G7) саммити доирасида учрашишини маълум қилди. Унинг айтишича, томонлар Украинадаги урушни тугатишга хизмат қилиши мумкин бўлган ташаббуслар ва тинчликка эришиш имкониятларини муҳокама қилади.

Фото: Ukrainian Presidential Press Service/REUTERS

Зеленский бу ҳақда Трамп билан бўлиб ўтган телефон мулоқотидан сўнг маълум қилди. Унинг сўзларига кўра, суҳбат давомида фронтдаги вазият, Украина позициясининг мустаҳкамланиши ва тинчликка эришиш йўллари муҳокама қилинган.

«Биз ҳозир тинчликни яқинлаштиришга ёрдам бериши мумкин бўлган масалаларни муҳокама қилдик. Саммитда бу мавзулар юзасидан янада батафсил гаплашишга келишиб олдик», — деди Украина раҳбари.

Зеленскийнинг таъкидлашича, учрашувда Украина хавфсизлиги, мамлакатнинг мудофаа имкониятлари ва адолатли тинчликка эришиш масалалари асосий мавзулардан бири бўлади. У, шунингдек, АҚШнинг Украинага кўрсатаётган ҳарбий ва сиёсий ёрдами учун миннатдорлик билдирди.

«Биз Javelin мажмуаларидан тортиб Patriot тизимларигача бўлган ҳар бир қўллаб-қувватлаш қадамини қадрлаймиз», — деди Зеленский.

Украина президенти суҳбат чоғида Трампни 80 ёшга тўлиши муносабати билан ҳам табриклаган. Зеленский мулоқотни «ажойиб суҳбат» деб баҳолаб, томонлар урушнинг келиб чиқиш сабаблари, дипломатик имкониятлар ва халқаро ҳамкорларнинг позицияларини муҳокама қилганини қайд этди.

Унинг сўзларига кўра, Трамп Қримнинг Россия томонидан аннексия қилиниши бутун можаронинг бошланиш нуқтаси бўлганини таъкидлаган. Зеленский мазкур фикрни муҳим сиёсий баёнот сифатида баҳолади.

Айни пайтда Россия президенти Владимир Путин ҳам Доналд Трамп билан телефон орқали мулоқот қилди. Кремл раҳбари ёрдамчиси Юрий Ушаков маълум қилишича, суҳбат 55 дақиқа давом этган ва унда халқаро вазият, Россия—АҚШ муносабатлари ҳамда Украинадаги уруш муҳокама қилинган.

Ушаковнинг айтишича, Трамп ҳарбий ҳаракатларни тўхтатиш зарурлигини яна бир бор таъкидлаган. Шу билан бирга, уруш қанчалик тез якунланса, Россия ва АҚШ ўртасидаги муносабатларни янги босқичга олиб чиқиш имконияти пайдо бўлишини билдирган.

Кремл маълумотига кўра, суҳбат давомида Эрон атрофидаги вазият ҳам муҳокама қилинган. АҚШ президентининг махсус вакиллари Стив Уиткофф ва Жаред Кушнер яқин вақтларда Россияга ташриф буюриши ҳам келишиб олинган.

15–17 июн кунлари Франциянинг Эвиан-ле-Бен шаҳрида ўтадиган G7 саммитида Украинадаги уруш, халқаро хавфсизлик, энергетика ва глобал иқтисодиёт масалалари муҳокама қилиниши кутилмоқда.