Қўшимча функционаллар
-
Тунги кўриниш
Ватикан ва «яҳудийлар лоббиси» Путинни алдади — Лукашенко
Россия президенти Владимир Путин Украинага бостириб кирилганидан сўнг, қўшинларига Киевдан чекинишни буюрган, чунки ундан буни «муайян сиёсатчилар ва кучлар» сўраган ва у «тинчликни тикламоқчи» бўлган, бироқ алданган. Бу ҳақда Александр Лукашенко Ал-Арабия телеканалига берган интервьюсида маълум қилди.
«Менимча, Бош штабдаги ҳарбий вакилларимиз ҳам, агар улар [Россия қўшинлари] Киевга ҳужумни давом эттирганида, у ерда Зеленский ҳам, ҳеч ким қолмаган бўларди, деб ҳисоблашади. Уларни [россияликларни] яна бир марта алдашди. Бу Ватикан ва ажабланарлиси, яҳудий лоббиси, исроилликлар эди. Улар [президент] Зеленский номидан: «Бўлди, тинчликка рози бўламиз», дейишди. Бошқалар ҳам. Мен шундан келиб чиқдим. Кейин эса уруш чўзилиб кетди», деб жавоб берди Лукашенко.
У, шунингдек, Путин қўшинлари 2022 йилда Киевда бўлганини ва Россия президенти қўшинларни Украина пойтахтидан олиб чиқишга рози бўлмагунча, «ҳамма Украинанинг кунлари саноқли эканини тушунганини» айтди.
Беларус президентининг сўзларига кўра, Киевдан чекиниш тўғрисидаги қарор Путин томонидан «тинчликни тиклаш» учун қабул қилинган. Унинг фикрича, бешинчи йил давом этаётган урушда «ҳеч ким ўз мақсадига эришмади», аммо Россия армияси «муваффақиятлироқ ва олдинга силжимоқда».
Шунингдек, Лукашенко Зеленскийга эҳтиёткор бўлишни, «тинчланишни» ва уни ва Беларус аҳолисини «қўзғатмасликни» тавсия қилди. Аввалроқ, май ойи охирида Лукашенко Украина президенти гиёҳванд моддалар истеъмол қилиши ва руҳий касалликка чалинган бўлиши мумкинлигини айтган эди. Лукашенко Зеленский ҳақидаги кескин сўзларига изоҳ берар экан, «қаердадир ошириб юборганини» тан олди.
«Балки мен қаердадир ошириб юборгандирман, лекин бу унинг ноўрин баёнотига жавоб эди: «Бизда 500 та нишон бор, биз Лукашенконинг қаердалигини биламиз. Биз эртага ракеталар, дронлар билан зарба берамиз», деди. Мен индамадим. Ҳатто ҳамма менинг индамаганимга ҳайрон бўларди. Мен тушунардим: одам шундай босим остида, ёш, тажрибасиз, у ҳарбий одам эмас. Балки миясида нимадир ишламаётгандир. Мен индамадим. Аммо менга таҳдид қила бошлаганида, жавоб беришга мажбур бўлдим», деди Беларус раҳбари.
«Агар Владимир Александрович [Зеленский] мендан ранжиган бўлса, бу гапим учун ундан узр сўрайман… Балки у ҳақда бунчалик кескин гапирмаслигим керак эди. Аммо, бошқа томондан, у тушуниши керак, бизда кўпинча шундай дейишади: қандай гапирсанг, шундай жавоб оласан», деди Александр Лукашенко.
