Капотнядаги заводга Россия ракетаси тушгани маълум қилинди

Москвадаги нефтни қайта ишлаш заводида рўй берган портлашга (айнан шу ерда резервуар томи ҳавога учиб кетган) катта эҳтимол билан украинлар дрони урилиши эмас, балки Россия ҳаво ҳужумидан мудофаа тизими ракетаси келиб тушиши сабаб бўлган.

18 июн куни кечқурун Хитойнинг тикток сегментида ушбу портлаш акс этган видеоролик кенг тарқалди; кейинроқ бу видео Украинадаги телеграм-каналлар бўйлаб айлана бошлади. Катта эҳтимол билан, бу видео Хитойдан келган шахс томонидан олинган – кадр ортида хитой тилидаги сўзлар эшитилган.

Видео бошида оператор фокусни учиб бораётган дронда тутиб туради. Кейин унинг йўналишида ортдан ракета учиб келади, аммо мўлжалдан адашади ва нефтни қайта ишлаш заводи ҳудудида ёқилғи сақланувчи омборга келиб урилади, шундан кейин кучли портлаш рўй беради.

Astra нашри OSINT-таҳлилчилари ҳамда «Агентство» билан суҳбатда бўлган уч нафар таҳлилчидан икки нафари ушбу видео асосида портлашга айнан ракета сабаб бўлгани ҳақида хулоса берган. Учинчи таҳлилчи эса резервуарга пастлаб учган ва кадрда кўринмаган дрон урилган, уни тўхтатиш учун учган ракета эса мўлжалдан оғиб кетган бўлиши мумкинлигини истисно қилмаган.

Astra нашри ёзишича, ракета «Панцир» комплексидан учирилган. «Озодлик радиоси» журналисти Марк Крутов яқинда, июн ойи ўрталарида Москва нефтни қайта ишлаш заводи яқинига шундай тизим жойлаштирилганига эътибор қаратган.

Украина дронларининг Москва шаҳри ва Москва областига 18 июн кунги ҳужуми уруш бошидан буён кузатилган энг йирик ҳужум бўлди. Москвадаги нефтни қайта ишлаш заводидан ташқари «Садовод» бозори ва «Мега Белая Дача» савдо комплексида ёнғинлар рўй берган. Москва областида дронлар бир неча турар жой биноларига урилган ва камида 17 киши яраланган.

19 июн куни ҳам Украина қуролли кучлари Москвага дронлар билан ҳужум қилишда давом этди. Бу сафар учувчисиз учиш аппаратлари кундузи учиб келган, шаҳар мэри Сергей Собянин бир ярим соат давомида украинларнинг 37 та дрони уриб туширилгани ҳақида маълумот берган. Ҳозирча қандайдир жиддий оқибатлар ҳақида хабар берилмади.