Май ойида Тошкент уй-жой бозорида қандай ўзгаришлар бўлди?

Тошкент шаҳри уй-жой бозорида май ойида нархлар сегментлар кесимида турлича ўзгарди. Иккиламчи бозорда 1, 2 ва 3 хонали квартиралар қимматлашган бўлса, 4 ва ундан ортиқ хонали уйлар арзонлашди. Бирламчи бозорда эса 1 ва 3 хонали хонадонлар нархи ошган, 2 ҳамда 4 хонали уйларда пасайиш кузатилган.

Фото: Kun.uz

Иқтисодий ва минтақавий тадқиқотлар институтининг май ойи таҳлилига кўра, бирламчи бозорда 1 хонали квартиралар нархи апрел ойига нисбатан 1,1 фоизга, 3 хонали квартиралар эса 2,7 фоизга қимматлашган. Шу билан бирга, 2 хонали уйлар нархи 1,1 фоизга, 4 ва ундан ортиқ хонали квартиралар эса 1,5 фоизга арзонлаган.

Иккиламчи бозорда энг катта ўсиш 1 хонали квартиралар сегментида қайд этилди. Уларнинг нархи бир ойда 5,8 фоизга ошган. Шунингдек, 2 хонали уйлар 0,6 фоизга, 3 хонали квартиралар 0,5 фоизга қимматлашган. 4 хонали ва ундан катта хонадонлар нархи эса 0,4 фоизга пасайган.

Туманлар кесимида Миробод, Яккасарой ва Мирзо Улуғбек туманлари энг қиммат уй-жой бозорига эга ҳудудлар сифатида қайд этилган. Сергели, Учтепа ва Олмазор туманларида эса нисбатан арзон уй-жойлар таклиф этилмоқда.

Таҳлил натижаларига кўра, пойтахт уй-жой бозорида талаб асосан кичик ва ўрта ҳажмдаги квартираларга юқори бўлиб қолмоқда. Бу эса айрим сегментларда нархлар ўсишининг давом этишига таъсир кўрсатмоқда.