«Бойсундаги авария 2027 йилда тўлиқ тўхтатилади» — Абдуғани Сангинов

Сурхондарё вилояти Бойсун туманидаги «Мустақилликнинг 25 йиллиги» конида 2024 йилнинг сентябр ойидан буён давом этаётган техноген вазият оқибатларини 2027 йилнинг биринчи ярмида тўлиқ бартараф этиш режалаштириляпти. Бу ҳақда «Ўзбекнефтгаз» бошқаруви раиси Абдуғани Сангинов Uzdiplomat нашрига берган интервьюсида маълум қилди.

Сангиновнинг сўзларига кўра, компания Бойсундаги вазият аҳолига жиддий ноқулайликлар туғдираётгани ва зарар етказаётганини тан олади.

«Бойсундаги вазият ҳозир ҳақиқатан ҳам халқимизга жуда катта зарар етказяпти. Ҳурматли президентимиз бу ерга келганларида менга уч-тўрт марта топшириқ бердилар: Бойсунни ёпиб беришимиз шарт», — деди у.

«Ўзбекнефтгаз» раҳбарининг сўзларига кўра, муаммони ҳал қилиш учун хорижий ҳамкорлар билан техник ҳисоб-китоблар ўтказилган ва Хитойнинг CNPC корпорациясига қарашли CCDC компанияси билан шартнома имзоланган. Ҳозирда шартнома расмийлаштириш ишлари якунланмоқда ва компания мутахассислари Бойсун конига етиб келиб, амалий ишларни бошлаган.
 
«Йил охиригача техника „М-25“ конига етказиб берилади. 2026 йилнинг декабр ойи охиригача яна тўртта қўшимча қудуқни бурғилаш ишлари бошланади. 2027 йилнинг биринчи ярмида 100 фоиз ёпилади», — деган Абдуғани Сангинов.
 
«Ўзбекнефтгаз» раҳбарининг таъкидлашича, Бойсун лойиҳаси бўйича Россия, АҚШ ва Жанубий Корея компанияларининг таклифлари ҳам ўрганилган.

«Бир нечта компания билан музокаралар олиб бордик. Россиянинг, Америка ва Корея компанияларининг таклифларини кўриб чиқдик. Таҳлиллар натижасида энг яхши техник ечим ва таклиф Хитойнинг CNPC корпорацияси томонидан берилди ва биз шу компанияни танладик», — деди у.

Қўшимча қилинишича, Хитой компанияси билан ҳисоб-китоб табиий ресурслар бериш орқали эмас, балки молиявий асосда амалга оширилади.