Финландия ядровий қуролга оид тақиқни бекор қилди

Финландия президенти Александр Стубб 26 июнь куни атом энергияси тўғрисидаги қонунга киритилган ўзгартишларни тасдиқлади. Унга кўра, мамлакат ҳудудига ядровий қуролни олиб кириш ва уни жойлаштиришга оид амалдаги тақиқ бекор қилинади. Тегишли ҳужжатлар Финландия парламенти сайтида эълон қилинган бўлиб, қонун 2026 йил 1 июлдан кучга киради.

Мазкур ўзгартишлар шу йилнинг 17 март куни парламент томонидан 125 нафар депутатнинг овози билан қабул қилинган, 61 нафар депутат эса қарши овоз берган.

Финландия мудофаа вазири Антти Хяккянен ушбу қарорни мамлакат хавфсизлиги учун тарихий қадам деб атади. Унинг таъкидлашича, янги қонун нафақат Финландия, балки бутун НАТОнинг мудофаа салоҳиятини мустаҳкамлашга хизмат қилади.

Президент Александр Стубб эса Финландия тинчлик даврида ўз ҳудудида ядровий қуролни доимий равишда жойлаштиришни режалаштирмаётганини маълум қилди. Унинг сўзларига кўра, гап ядровий тийиб туриш сиёсати ҳақида кетмоқда.

«Бу шундай тийиб туриш воситасики, унинг асосий мақсади ядровий қуролдан ҳеч қачон фойдаланишга эҳтиёж туғилмаслигини таъминлашдир», — деди Финландия раҳбари.

Қонун қабул қилиниши Россия томонидан ҳам кескин баҳоланди. Кремл март ойида Финландия ҳудудида ядровий қурол жойлаштирилса, Москва тегишли жавоб чораларини кўришини маълум қилган эди.

Бу баёнотга жавобан мудофаа вазири Хяккянен Ҳелсинки Россиянинг эҳтимолий реакциясига тўлиқ тайёр эканини айтди. Унинг фикрича, қонунчиликдаги мазкур ўзгариш Финландиянинг Россия томонидан ҳарбий босимга учраш эҳтимолини камайтиради.

Сўнгги йилларда Финландия хавфсизлик сиёсатида бир қатор муҳим қарорларни қабул қилди. Жумладан, мамлакат 2026 йил январ ойида пиёдаларга қарши миналарни ишлаб чиқариш, сақлаш ва қўллашни тақиқловчи Оттава конвенциясидан расман чиққанини эълон қилди.

Президент Стубб бу қарорни дунёдаги хавфсизлик вазияти ёмонлашгани билан изоҳлаган. Унинг таъкидлашича, Финландиянинг қўшниси бўлган Россия Оттава конвенцияси иштирокчиси эмас ва Украинада ер миналаридан кенг фойдаланмоқда.

Финландия Россиянинг Украинага қарши кенг кўламли уруши бошланганидан кейин, 2022 йил май ойида НАТОга аъзо бўлиш истагини билдирган эди. Мамлакат 2023 йил апрел ойида расман алянсга қабул қилинди. Финландиянинг Россия билан умумий чегараси 1300 километрдан ортиқни ташкил этади.

Шу билан бирга, Александр Стубб 2026 йил май ойида Европа давлатларини Россия билан тўғридан тўғри мулоқотни қайта тиклаш вақти келганини ҳам таъкидлаган эди.