Венесуэлада зилзила қурбонлари сони 1700 нафардан ошди

Венесуэла Миллий ассамблеяси раиси Хорхе Родригес душанба, 29 июн куни телевидение орқали қилган чиқишида зилзила оқибатлари ҳақидаги сўнгги маълумотларни эълон қилди. Унинг айтишича, табиий офат натижасида 15 866 киши бошпанасиз қолган.

Аввалроқ зилзилалар қурбонлари сони камида 1450 нафар экани хабар қилинган эди. Бироқ қутқарув ишлари давом этаётгани ва ўн минглаб одамлар бедарак йўқолганлар рўйхатида қолаётгани сабабли қурбонлар сони яна ошиши мумкинлиги айтилмоқда.

Фожиа 24 июн куни Венесуэла шимолида, пойтахт Каракасдан ғарбда содир бўлган. Ҳудудда атиги 39 сония фарқ билан магнитудаси 7,2 ва 7,5 бўлган икки кучли зилзила қайд этилган. Мутахассислар буни мамлакатда сўнгги 125 йилда кузатилган энг кучли сейсмик ҳодисалардан бири сифатида баҳоламоқда.

Асосий силкинишлардан кейин ўнлаб афтершоклар ҳам рўй берган. Зилзила оқибатида кўплаб турар жой бинолари ва инфратузилма объектлари вайрон бўлган. Айниқса, халқаро аэропорт ва мамлакатнинг энг йирик денгиз порти жойлашган Ла-Гуайра штати жиддий зарар кўрган.

Зилзиладан кейин Венесуэлада фавқулодда ҳолат эълон қилинди. Қутқарувчилар вайроналар остида қолганларни излаш ишларини давом эттирмоқда. Бедарак йўқолганлар сони юқорилиги сабабли мамлакатда вазият оғирлигича қолмоқда.

АҚШ Миллий цунами ҳақида огоҳлантириш маркази маълумотига кўра, Венесуэлада “сейсмик дуплет” деб аталадиган ҳодиса юз берган. Бундай ҳолатда бир ҳудудда жуда қисқа вақт оралиғида катта магнитудали икки зилзила содир бўлади.