ЖЧ кундалиги. Парагвай Францияни қийнади, Марокаш Канадани жазолади

Жаҳон чемпионатида 1/8 финал босқичи старт олди. Ушбу босқичнинг илк ўйинида Марокаш турнир мезбонларидан бири Канадани йирик ҳисобда мағлуб этди (3:0), Франция эса Парагвай билан ўйинда катта қийинчиликка учради (1:0).

Майдон ташқарисида ҳам жаҳон чемпионатига алоқадор воқеалар давом этмоқда: Кабоверделик Возиня жаҳондаги энг машҳур дарвозабонга айланди, ФИФА президенти Жанни Инфантино навбатдаги можарога аралашиб қолди, Мексикадаги картел эса Эквадор футболчиларига босим ўтказишда айбланмоқда.

Танташевнинг тушунарсиз қарорлари

Парагвай – Франция 0:1
Гол: Мбаппе, 70 – пеналти (0:1)
Парагвай: Ҳил, Веласкес, Алдерете (Канале, 58), Г. Гомес (Маурисиу, 71), Алонсо, Касерес, Д. Гомес, Кубас, Галарса, Алмирон (Авалос, 71), Энсисо (Кабалеро, 61)
Франция: Менян, Упамекано, Салиба, Дин, Кунде, Коне, Рабио, Олисе, Барколя (Дуэ, 61), Дембеле (Шерки, 84), Мбаппе
Огоҳлантиришлар: Барколя, 19. Коне, 81. Олисе, 90

Германия ортидан Франция ҳам Парагвай билан ўйинда азоб чекди. Шунга қарамай, пеналтидан урилган ягона гол эвазига кейинги босқичга чиқди. Энди Диде Дешам шогирдлари 10 июлга ўтар кечаси чоракфиналда Марокаш билан ўйнайди.

Бу турнирдаги энг ўйин дақиқалари энг кам ўйинлардан бири бўлди – бу ўйинда комбинациялардан кўра кураш, тўқнашув, провокациялар кўпроқ бўлди, ўзбекистонлик ҳакам Илгиз Танташев эса ўйин тизгинини қўлдан чиқарди. Парагвайликлар 90 дақиқа давомида «ифлос» ўйин кўрсатган бўлса-да, бирорта карточка олмади, жабрланувчи ролида бўлган французлар эса уч марта огоҳлантирилди.

Парагвай илк дақиқаларданоқ кескин ҳаракатлар қилишни бошлади ва асосий эътиборини рақибни издан чиқаришга ҳаракат қилди. Лекин биринчи бўлимдаги ягона карточка Касерес билан тўқнашувдан кейин Барколяга кўрсатилди.

Биринчи бўлим

Барчаси ўйиннинг ярим соати ортда қолганида бошланди. Густаво Веласкес тўп учун кураш вақтида дарвозабон Майк Меняннинг бошига чиқиб кетди, бу оддий вазиятдек кўринганди, аммо такрорий кадрлар парагвайлик футболчи қасддан дарвозабоннинг бошига зарба берганини кўрсатди.

Ўзбекистонлик ҳакам Илгиз Танташев французларнинг эътирозини тинглади, аммо ҳеч қандай чора кўрмади. Парагвайликлар эса бизга барчаси мумкин экан, деган хулоса чиқаришди.

Парагвайликлар айниқса Мбаппега қарши ўта кескин ҳаракат қилишди, 35-дақиқада Килианга ишлатилган навбатдаги фолдан кейин футболчилар тўпланиб, жанжал бошланиб кетди.

Бўлим охирида яна бир баҳсли вазият юзага келди. Французларнинг тезкор ҳужуми чоғида Парагвай яримҳимоячиси Матиас Галарса тирсаги билан Мбаппенинг елкасига зарба берди. Килиан йиқилди, аммо Танташев ва видеоарбитрлар бу эпизодни эътиборсиз қолдиришди.

Ҳолбуки бу вазиятда Галарса ўта тажовузкор ҳаракат қилганди, жуда яқинда турганига қарамай, Танташев фол қайд этмади, парагвайлик футболчи қасддан рақибни ургани учун майдондан четлатилиши лозим эди, бу вақтда тўп майдоннинг бошқа нуқтасида эди.

Иккинчи бўлим

Танаффусдан кейин ҳам кескин яккакурашлар давом этди.

Иккинчи бўлим бошида Веласкес Майкл Олисенинг бошига тиззаси билан зарба берди. Танташев парагвайлик футболчини оғзаки огоҳлантириш билан чекланди.

67-дақиқада парагвайликлар дарвозаси томон пеналти белгиланди, лекин Танташев аввалига Гомеснинг Дуэга ишлатган фолини ҳам эътиборсиз қолдирганди. Фақат VAR аралашувидан кейин ўзбекистонлик ҳакам қарорни ўзгартирди.

Парагвайликлар эса эътьироз билдиришди ва французларга пеналтини ижро этишга тўсқинлик қилишга уринишди. Баҳс авжида Веласкес ҳеч кимга билдирмай, 11 метрлик нуқта ўрнида чуқур қазишга киришди.

Лекин бу Мбаппе зарбани аниқ ижро этишига халал бера олмади.

Шундан кейин йўқотадиган нарсаси қолмаган Парагвай кескинлик даражасини янада оширишга қарор қилди – жанубий америкалик футболчилар рақибни очиқчасига провокация қилишди ва ҳеч кимга сездирмай, уриб кета бошлашди, буни Танташев ҳам сезмади.

Андрес Кубас тўғридан тўғри Рабионинг оёғига ташланди. Ҳакам ҳуштак чалиб, ўйинни тўхтатди, аммо карточка кўрсатиш ўрнига футболчиларни тарқалишга чақирди.

76-дақиқада Мбаппе рақиб ҳимоячиси Касересни туртиб йиқитиб юборди, у эса ерда ётган ҳолатида бутсаси билан француз футболчисининг тўпиқ соҳасига тепди. Танташев эпизодни эътиборсиз қолдирди, Парагвай эса жарима зарбасини ижро этди.

80-дақиқада французлар дарвозаси яқинида аут ижро этилиши чоғида Авалос ҳакамнинг кўз ўнгида тирсаги билан Упамеканонинг кўкрак қисмига зарба берди.

Танташев бунинг учун ҳам карточка кўрсатмади, фолни ҳам фақат ҳимоячи йиқилганидан кейин қайд этди.

Кейинги ҳолатда Касерес ҳам ўзини Рабионинг оёғига отди, француз футболчиси бу сафар ҳам ўзини олиб қочишга улгурди.

Қўшимча дақиқалар

90-дақиқадан кейин провокация кучайишда давом этди, бу борада биринчи бўлимда қизил карточкадан қутулиб қолган Матиас Галарса жонбозлик кўрсатди.

У аввалига арбитрнинг кўз ўнгида Олисега фол ишлатиб, кейин унинг устига келган ҳолда нимадир деди, аммо яна жазоланмади.

90+5-дақиқада Галарса биринчи бўлимда бўлгани каби тезлик билан кетаётган Кунденинг бўйин қисмига урди. Арбитр бу ҳолатга ҳам эътибор қаратмади.

Икки дақиқа ўтиб Галарса майдон марказида Олисе билан яккакурашни бой бериб, газонга йиқилди, шундан кейин ўрнидан турди ва рақибни турта бошлади, Майкл шунчаки унинг футболкасидан ушлаганида майдонга йиқилиб, думалай бошлади. Танташев эса бу вазият учун фақат «Бавария» футболчисини сариқ карточкага муносиб кўрди.

90+8-дақиқада Парагвай бурчак зарбаси ижро этишга тайёрланаётганида Галарса яна кутилмаганда газонга ётиб олди. Ҳолбуки бу вазият Матиас қўлларини ишга солиб, Кундени туртиши билан бошланганди, шундан кейин, катта эҳтимол билан «Барселона» ҳимоячиси унга жавоб қайтарган (трансляцияда бу ҳолат кўрсатилмади). Галарса пеналти ишлаш учун йиқилиб олди, лекин Танташев унга бу сафар ишонмади.

Ўйин охирида, Франция футболчилари вақтни ўлдириш учун тўпни бурчакка олиб кетганида, Галарса подкат ишлатиб, тўпни Мбаппедан майдон ташқарисига чиқариб юборишга уринди, аммо фақат бурчакдаги байроқчани тепди.

Бунга эса Килиан жилмайганча реакция қилди ва парагвайлик футболчи ўрнидан туриб, унга яна провокация қила бошлади. Франциялик форвард жилмайишда давом этди.

У ўзини ортдан йиқитган Касерас навбатдаги марта жазосиз қолганида ҳам жилмайишда давом этди.

Финал ҳуштаги чалинганидан кейин эса парагвайликлар дарвозабони Орландо Ҳилнинг ҳам асаблари дош бермади – аввалига у Мбаппени қўллари билан туртди, кейин эса унга қарата тўп отди – Килиан эса унга эътибор бермасдан, ғалабани нишонлашда давом этди.

Якунда Парагвай шунча қўполлик ва симуляцияларга қарамай, ўйинни бирорта огоҳлантиришсиз якунлади. Эътиборли жиҳати, бу Парагвай жамоаси 1998 йилдан буён жаҳон чемпионати ўйинини сариқ карточкасиз ўтказиши бўлди.

Мбаппе ва Дешамнинг реакцияси

Ўйиндан кейин Мбаппе ҳиссиётларини тийиб ўтирмади. Франция миллий жамоаси форварди парагвайликлар ўйини ҳақида ўйлаганини айтди:

«Бизни қандай ўйин кутаётганини билардик. Агар бизга ифлослик қилишса, биз ҳам шуни қила оламиз. Парагвай футбол ўйнашни хоҳламади, биз эса рақибга буни қила олишимизни кўрсатдик. Агар ғалаба учун қўлимизни булғашимиз керак бўлса, буни қиламиз. Улар ўйинда смокингда чиқишимизни ўйлашганди, аммо уларнинг кутилмаларини чиппакка чиқардик, биз ҳам ифлос футбол қилишни биламиз. Ва ҳатто улардан яхшироқ!»

Франция миллий жамоаси устози Диде Дешам ҳам бу борада фикр билдирган.

«Биз гувоҳ бўлган нарса бизнинг тушунчамиздаги футбол эмасди. Бу кўпроқ жанг ёки курашга ўхшарди. Менимча, футбол бундан яхшироғига лойиқ. Мухлислар доимий муштлашувларни эмас, балки сифатли ўйинни кўришга лойиқ», – дея Дешамнинг сўзларини келтиради ФИФА матбуот хизмати.

Канада турнирни тарк этди

Канада – Марокаш 0:3
Голлар: Унаи, 50 (0:1). Унаи, 82 (0:2). Раҳими, 90+8 (0:3)
Канада: Крепо, Де Фужерол, Бомбито, Ларея (Шаффелберг, 78), Жонстон, Эуштакиу, Сигур (Осорио, 87), Аҳмад (П. Дэвид, 78), Бюкенен (Нелсон, 87), Ж. Дэвид, Олувасейи (Ларин, 63)
Марокаш: Буну, Диоп (Ал Мурабет, 87), Ҳалҳал, Мазравий, Ҳакими, Буадди (Амрабат, 63), Ал-Айнавий, Унаи (Саадан, 87), Ал-Ҳаннус (Талби, 63), Диас, Сайбари (Раҳими, 22)
Огоҳлантиришлар: Ларея, 40. Ж. Дэвид, 43. Де Фужерол, 49. Ларин, 67 – Ҳалҳал, 20. Ҳакими, 40. Унаи, 45. Ал-Ҳаннус, 45

Канада 2026 йилги жаҳон чемпионати мезбонлари орасида биринчи бўлиб турнирни тарк этди. Шимолий америкаликлар жамоаси В гуруҳида муносиб иштирок этган (жумладан, Қатар йирик 6:0 ҳисобида таслим этилган), 1/16 финалда ЖАР тўсиғидан ўтилганди (2:0), аммо кейинги босқичда Марокаш мезбонларни аямади – 0:3.

Ҳисоб йирик кўриниш олганига қарамай, канадаликлар бу қадар оғриқли мағлубиятга лойиқ ўйнамаганди – Жесси Марш шогирдлари стартда кучли босим уюштирганди, аммо ҳужум чизиғи вакиллари вазиятлардан фойдалана олмади. Африкаликлар эса турнирдаги энг ёмон ўйинини ўтказганига қарамай, якунда ғалабага эришди. Иккинчи бўлимда аввалига стандарт вазиятда Аззадин Унаи ҳисобни очди, кейин қарши ҳужумда ушбу яримҳимоячи дублни расмийлаштирди, ўйинга қўшиб берилган дақиқаларда Сўфён Раҳимий ҳам қарши ҳужумда мезбонларни жазолади.

Канадаликлар турнирни муносиб ўтказди ва мамлакатда футбол янги босқичга кўтарилганини намойиш этишди. Марокаш эса жаҳон чемпионатида қаторасига иккинчи бор чоракфиналга йўл олди – 2022 йилги мундиалда жамоа тўртинчи ўринни эгаллаганди. Энди Муҳаммад Ваҳби шогирдларини кейинги босқичда 10 июлга ўтар кечаси Францияга қарши ўйин кутмоқда.

Возиня – энг машҳур дарвозабон

Кабо-Верде дарвозабони Возиня биринчи турдаёқ Испанияни тўхтатиш (0:0) орқали турнир қаҳрамонига айланганди. Бу ўйиндан олдин 40 ёшли дарвозабоннинг инстаграм саҳифасида 50 минг атрофида обуначи бўлган, шундан кейин қисқа муддат ичида унинг обуначилари сони 15 миллиондан ошиб кетди. Африкаликлар жамоаси плей-оффга чиқиб, Аргентина билан ўйнагач, унинг машҳурлиги янада ошди.

Амалдаги жаҳон чемпионларига қарши ўйинда ҳам Возиня қаҳрамонлик кўрсатди: кабовердиликлар бу ўйинда 2:3 ҳисобида ютқазган бўлса-да, дарвозбоннинг сейвлари туфайли йирик ҳисобдаги мағлубиятдан қутулиб қолишди. У энди ўз позициясидаги энг машҳур футболчига айланди – ҳозирда унинг ижтимоий тармоқдаги обуначилари сони 22 миллиондан ошиқни ташкил этмоқда. У бу борада Икер Касиляс (20), Кейлор Навас (19) ва Тибо Куртуадан (18) яхшироқ кўрсаткичга эга.

Мексика картели Эквадорга босим қилганми?

1 июл куни Мексика миллий жамоаси 1/16 финалда Эквадорни 2:0 ҳисобида мағлуб этди. Ўйиндаги икки гол ҳам ўйиннинг дастлабки қисмидаёқ урилди. Турнир мезбонлари ҳақли равишда ғалаба қозонгандек эди, аммо кўп ўтмай бу борада ноодатий гаплар чиқа бошлади. Аргентиналик журналист Эдуардо Фейнманнга кўра, бу ўйиндан олдин Мексика картели эквадорлик футболчиларга босим ўтказган.

Манбанинг сўзларига кўра, наркосавдоргарларнинг вакиллари Эквадор миллий жамоасининг беш нафар футболчиси билан алоқага чиқиб, «ҳар қандай ҳолатда ҳам Мексика жаҳон чемпиони» бўлиши кераклигини айтиб, ўйинда ютқазиб беришни талаб қилишган, акс ҳолда уларнинг оила аъзолари билан муаммолар юзага келиши ҳақида огоҳлантириб, таҳдид қилишган. Кейинроқ бу маълумотни бошқа бир журналист Карлос Вера ҳам тасдиқлади.

Лекин эквадорликлар бу маълумотни рад этиб чиқишди. Эквадор футбол федерацияси матбуот хизмати вакили El Pais нашри билан суҳбатда бу маълумотни «мутлақо ёлғон» деб атади.

Инфантино Аргентинага симпатияси борлигини тан олди

Анчадан буён ФИФА президенти Жанни Инфантино Аргентинани қўллаб-қувватлаши ҳақида гаплар юради. Амалдаги жаҳон чемпионлари Кабо-Верде устидан ғалаба қозонгач (3:2), ушбу футбол мулозими амалда ушбу миш-мишларни тасдиқлади.

«Аргентинадаги барчани табриклайман, чунки бугун менинг юрагим сиз билан эди, қаттиқ хавотирландим», – деган Инфантино кўкрагига уриб.

ФИФА раҳбари дарҳол тузатиш киритиб, «бетараф бўлиб қолиши»ни қўшимча қилди. Аммо бутун дунёдаги ижтимоий тармоқ фойдаланувчилари энди унга ишонмайди ва унинг истеъфосини талаб қила бошлашди.

Навбатдаги ўйинлар

1/8 финал босқичи давом этмоқда – 5 июл куни тунда ва 6 июл тонгида мухлисларни қуйидаги учрашувлар кутмоқда:

01.00. Бразилия – Норвегия
05.00. Мексика – Англия