ЖЧ анонси. Ямал Роналдуга, АҚШ бутун дунёга қарши

7 июлга ўтар кечаси ва тонгда футбол бўйича жаҳон чемпионатида нимчоракфинал доирасида яна икки учрашув ўтказилади: дастлаб Ламин Ямал бошчилигидаги испан юлдузлари Криштиану Роналду бошчилигидаги португал юлдузларига қарши майдонга чиқади. Тонгда эса турнир мезбонларидан сўнггиси АҚШ чоракфинал йўлланмаси учун Белгияга қарши тўп суради.

Португалия – Испания
6 июл, 00:00. AT&T Stadium, Арлингтон

Ишонч билан айтиш мумкинки, Иберия дербиси 1/8 финалдаги энг ёрқин афиша. Кўпчилик футбол мухлислари бу ўйинга ўтмиш ва келажак тўқнашуви сифатида қараши мумкин: фаолиятидаги сўнгги йирик турнирни ўтказаётган Криштиану Роналду (у ўйин арафасида жаҳон чемпионатидан кейин миллий жамоа билан хайрлашишини расман тасдиқлади) ҳали катта турнирлари олдинда турган Ламин Ямалга қарши майдонга чиқади. Лекин ҳозирча бу икки футболчи турнирни кучли ўтказмаяпти. 41 ёшли португалиялик учта гол урди, аммо шундан иккитаси анча кучсиз рақиб дарвозасига, учинчисини – пеналтидан. 18 ёшли испаниялик эса биргина гол билан чекланди – у турнир арафасида жароҳат олганди ва ҳали энг яхши формасига қайтмаган.

Шунинг учун бу ўйин икки суперюлдуз қарама-қаршилигидан каттароқ ўлчамга эга. Испания 1/8 финалга жуда яхши ҳолатда етиб келди – асосий футболчилар соғ (фақат Нико Уилямс истисно), ҳужум чизиғи вакиллари ўйиндан ўйинга очилмоқда, қолаверса, 1/16 финалда Австрияга қарши ўйинда куч тежаш имкони бўлди – рақиб жиддий қаршилик кўрсатмади ва «Қизил фурия» ўз имкониятларининг тахминан 70 фоизи даражасида ўйнади. Энди эса жамоадан тўлиқ кучини ишга солиш талаб этилади.

Португалия эса ўзи истамаган ҳолда турнир бошидан буён ўз имкониятлари даражасида ўйнай олмаяпти. Роберто Мартинес бошқарувидаги жамоада барқарорлик йўқ – португаллар гоҳ доминант ўйин қўйишмоқда, гоҳ ўйин тизгинини қўлдан чиқаришмоқда ва рақибга кўп имкон бериб юбормоқда. Миллатлар лигаси финалида Испания ва Португалия ўртасида тенг кураш кечганди – бу сафар кучлар нисбати қандай бўлишига яқин соатлар ичида жавоб топилади. Икки жамоа маркази ҳам ўз авлодининг энг кучли вакилларидан таркиб топгани ўйиндаги интригани оширади. Ҳозирча Родри ва Педри боғлами Невеш – Витиня жуфтлигидан яхшироқ кўринмоқда, аммо алоҳида ўйинда барчаси ўзгариб кетиши мумкин.

АҚШ – Белгия
7 июл, 05:00. Lumen Field, Сиэтл

Турнир мезбонларидан бири бўлган АҚШ миллий жамоаси гуруҳ босқичида бетараф мухлисларда яхши таассурот қолдирган, Парагвай (4:1) ҳамда Австралия (2:0) билан ўйинларда тўлиқ устунликка эришиб, гуруҳ босқичи масаласини муддатидан олдин ҳал этганди. Плей-оффда эса Босния ва Ҳерцоговина тўсиғидан ўтилди (2:0).

Ва Белгия билан ҳал қилувчи ўйиндан олдин айнан боснияликларга қарши ўйиндаги эпизод муҳокамалар марказига чиқди. Америка томони сўрови билан ФИФА ўша ўйинда қизил карточка олган ва Белгияга қарши ўйнамаслиги керак бўлган Фоларин Балогуннинг дисквалификацияси кечиктирилди.

Жамоаларнинг шу йил баҳорида бўлиб ўтган ўртоқлик учрашувида Европа вакиллари 5:2 ҳисобида ғалаба қозонган, лекин бундай учрашувга ёндашув расмий ўйинлардагидан тубдан фарқ қилиши ҳисобга олинса, бу натижа амалда ҳеч нарсани англатмайди.

Мундиал давомида Маурисио Почеттино жамоаси ўйиннинг Б ва С режаларга ҳам ўта оладиган тактик ҳамелеон эканини намойиш этди; Белгия ўйини эса Де Брюйне, Троссар, Доку ёки Лукаку каби футболчиларининг ўйини чиқишига боғлиқ.

Лекин мезбонлар жамоаси атрофидаги сўнгги воқеалар ички муҳитга таъсир қилиши, футболчилар босим остида қолиши мумкин, Белгия эса энди бутун дунё бўйлаб мухлислар қўлловига эга бўлиши тайин.

Бу Белгиянинг «олтин авлоди» учун сўнгги турнирни муносиб ўтказиш йўлидаги навбатдаги имкон, АҚШ эса майдон ташқарида бўлаётган турли гапларга майдонда муносабат билдириши талаб этилади. Ушбу жуфтлик ғолиби чоракфиналда Испания ва Португалиядан бирига рўбару келади.