ЖЧ анонси. Пойгадаги Месси ва Швейцарияга қарши Колумбия

7 июл куни кечқурун футбол бўйича жаҳон чемпионатида нимчоракфинал доирасида яна икки учрашув ўтказилади: дастлаб Лионел Месси бошчилигидаги Аргентина миллий жамоаси Муҳаммад Салоҳ бошчилигидаги Мисрга қарши майдонга чиқади. Кейин эса Швейцария чоракфинал йўлланмаси учун Колумбия билан баҳс олиб боради.

Ҳозиргача чоракфиналнинг учта жуфтлиги аниқ бўлган:

Франция – Марокаш
Англия – Норвегия
Испания – Белгия

Аргентина–Миср ва Швейцария–Колумбия жуфтликлари ғолиблари кейинги босқичда ўзаро рақиб бўлади.

Аргентина – Миср
7 июл, 21:00. Mercedes-Benz Stadium, Атланта

Бошқа турнирда бундай жуфтликда Аргентина шубҳасиз фаворит саналган бўларди. Аммо ўтган босқичда Кабо-Верде амалдаги жаҳон чемпионларига қарши ўйинда сўнгги дақиқагача интригани сақлаб қолгани – ҳар қандай жамоадан сюрприз кутиш мумкинлигини кўрсатди. Аргентина ўша ўйинда Сидни Лопеш Кабралдан ушбу босқичнинг энг чиройли голини ўтказиб юборди ва фақат қўшимча бўлимлардаги автогол эвазига кейинги босқичга ўтди.

Қолаверса, аргентиналикларда бир футболчига қарамлик яққол кўзга ташланмоқда: жамоа бу турнирда урган 11 та голдан 7 тасини 39 ёшли Лионел Месси урди, гол+пас бўйича ундан кейинги энг яхши натижа ҳимоячи Лисандро Мартинесга (1+1) тегишли.

Лео жамоасининг ўйин натижасига таъсир кўрсатиш бўйича асосий футболчиси: ҳар 90 дақиқада ўртача гол уриш (1,97), дарвоза соҳасига тўғри борган зарба бериш (4,2) ва жами зарбалар сони бўйича (6,8) у биринчи.

Бу ўйин учун турнир тўпурарлари рўйхатида яққол биринчи ўринга чиқиб олиши имконияти ҳам (ҳозирда ундан ташқари Мбаппе ва Ҳоландда ҳам 7 тадан гол бор). 

Мессининг спорт формасига саволлар йўқ – у чиндан ҳам натижа кўрсатмоқда, аммо футболчининг ёшидан келиб чиқилса, Аргентинага бир футболчига қарамлик панд бериб қолиши мумкин. 

Жазоир, Австрия, Иордания ва Кабо-Верде каби жамоаларга ҳурмат сақлаган ҳолда айтиш мумкинки, «Албиселесте» йўлидан ҳозирча жиддий рақиблар учрамади. Жиддий рақибларга қарши ўйинлар бошланганида эса Мессида ўйиннинг тенг ярмини майдонда пиёда юрган ҳолда ўтказишга имкон бўлмайди.

Бунгача бўлиб ўтган ўйинларда ҳам унда чарчоқ сезилган паллаларда на Лаутаро, на Ҳулиан Алварес ва на Энцо Фернандес масъулиятни ўз зиммасига олишга жазм этмоқда. Аргентинада юқори савияли футболчилар жамланган, аммо улар бу турнирда Лео орқали ҳужум қилиш йўллари ёпилганида нима қилишни билмай қолаётгандек кўринмоқда. Мудофаа чизиғи эса нисбатан кучсиз рақибларга қарши ўйинларда ҳам кўп хатога йўл қўйди. Турнирнинг ҳал қилувчи босқичларида эса бундай хатолар кечирилмайди.

Албатта, аргентиналиклар Миср билан ўйинда ҳам фаворит бўлиб қолаверади, аммо катта турнирларда тобланган рақибга (Миср Кабо-Вердедан бир бош баланд жамоа эканига шубҳа йўқ) қарши ўйинда жамоа ўйинидаги муаммолар бўй кўрсатиши мумкин. Ҳуссам Ҳассан шогирдлари тўпсиз ҳолатда ҳам ўзини яхши ҳис қилади, позицион жиҳатдан яхши ҳимояланади ва қарши ҳужумларда хавфли. Бу ўйиндаги интрига Аргентина қанча голли вазият яратишида эмас, балки бутун ўйин давомида диққатни жамлаган ҳолда қолиш ва рақибга имкон бермасликни қанчалик уддалашида. Бу ўйинни Месси ва Салоҳдан қайси бири вазиятлардан яхшироқ фойдаланиши эмас, ким жамоавий ўйин намойиш эта олиши ҳал қилади.

Колумбия – Швейцария
8 июлга ўтар кечаси, 01:00. BC Place, Ванкувер

Колумбия ҳам, Швейцария ҳам турнир ғолиблиги учун асосий даъвогарлар қаторида эмас, аммо икки жамоа ҳам узоққа боришга қодирлигини кўрсатди. Параллел учрашувлардаги фаворитлар нисбатан кучсиз жамоаларга (Парагвай, Кабо-Верде, Мексика) қарши ўйинларда катта куч йўқотаётгани инобатга олинса, бу жуфтлик вакилларида имконият янада ошади.

Колумбия ушбу ўйинга яхши кайфиятда келмоқда, аммо 1/16 финал ўйини жамоа учун енгил сайр бўлмади. Ганага қарши ўйинда Жон Ариаснинг ягона голи эвазига ғалаба қозонилди, ўйин эса Нестор Лоренсо шогирдлари ҳисобни сақлаб қолиш учун ўйнашни жуда яхши ўрганганини яна бир бор кўрсатди. Колумбияликлар бутун ўйин давомида ташаббусга эгалик қилишга интилмасдан, сабр билан рақиб хато қилишини кутди ва ўта хавфли қарши ҳужумлар уюштирди. Жамоа турнир давомида атиги бир гол (Аббос Файзуллаевдан) ўтказгани бежиз эмас.

Швейцария ҳам турнир давомида ўзининг кучли томонларини намойиш эта олди. Жазоирга қарши ўйинда тезкор гол уриб олинганидан кейин европаликлар тўпни рақибга топширди ва бутун ўйин давомида ишончли ҳимояланди. Мурат Якин жамоаси ёрқин футбол учун таваккалчилик қилмайди ва бу босқичда кичик хато ҳам қимматга тушиши мумкинлигини жуда яхши тушунади.

Бу ўйинда ким рақибни одатий сценарийсини ўзгартиришга мажбур эта олса, устунлик ўшанда бўлади. Бу қарама-қаршиликда Колумбия биринчи рақам остида ҳаракат қилиши ва юқори чизиқда прессинг уюштиришини тахмин қилиш мумкин, аммо Швейцария сафида босим остида тўпни ушлаб турадиган ва тўп билан олдинга бора оладиган Жака каби тажрибали футболчилар етарлича. Икки хил ўйин услубидаги жамоалар баҳсида устун келган жамоа катта эҳтимол билан чоракфиналда Аргентинага қарши ўйнайди.