ЖЧ кундалиги. Мессида рекорд ва антирекорд, Швейцария кучли саккизликда

Жаҳон чемпионатида 1/8 финал босқичи якунига етди. Аргентина Миср билан ўйинда телбавор камбэк амалга оширди (3:2), Швейцария эса Колумбия билан ўйинни пеналтилар сериясида ҳал қилиб (0:0, 4:3) кейинги босқичга йўл олди. Энди ушбу ғолиб жамоалар чоракфиналда ўзаро куч синашади.

Майдондан ташқарида ҳам эътиборга молик воқеалар рўй бермоқда: Португалия миллий жамоаси бош мураббийи Роберто Мартинес истеъфога чиқди, Парагвайда Килиан Мбаппени танқид қилишда давом этишмоқда, норвегиялик футболчилар эса шамоллаб қолди.

Ҳолливудча сценарий

Аргентина – Миср 3:2
Голлар: Ёсир Иброҳим, 15 (0:1). Зико, 67 (0:2). Ромеро, 79 (1:2). Месси, 83 (2:2). Фернандес, 90+2 (3:2)
Аниқ ижро этилмаган пеналти: Месси, 21’
Аргентина: Э. Мартинес, Л. Мартинес, Ромеро (Отаменди, 90+5), Таляфико (Гонсалес, 66), Молина (Монтиэл, 73), Паредес, Макаллистер, Фернандес, де Паул (Л. Мартинес, 66), Алварес (Медина, 90+5), Месси
Миср: Шубайр, Ёсир Иброҳим, Робия, Ҳафиз, Ҳани, Лашин (Сайид, 90+5), Атея, Ашур (Фати, 46), Ҳассан (Трезеге, 73), Салоҳ, Зико (Мармуш, 80)
Огоҳлантиришлар: Шубайр, 90. Фати, 90. Атея, 90

Аргентиналиклар ўтган босқичдаёқ драматик ўйинлар ўтказа олишини исботлаганди. Аммо 1/8 финалда Мисрга қарши ўйинда жамоа даражани яна бир босқичга кўтарди ва жаҳон чемпионатлари тарихидаги энг ёрқин камбэклардан бирини амалга оширди.

Учрашув «Албиселесте» учун тезкор гол ўтказиб юбориш билан бошланди, кейин эса Лионел Месси пеналтини ура олмади (ва жаҳон чемпионати давомида икки бор пеналтидан гол ура олмасдан, антирекорд қайд этди). Иккинчи бўлимда аргентиналиклар Мустафо Зикодан иккинчи голни ҳам ўтказиб юборишди.

Иш сенсацияга қараб кетаётганида Лионел Скалони шогирдлари максимал ҳужумкор режимни ёқишди. 79-дақиқада Месси тўпни жарима майдонига кириб борган ҳимоячи Кристиан Ромеронинг бошига етказиб берди ва ҳисоб қисқарди. Бир неча дақиқа ўтиб Леонинг ўзи мисрлик ҳимоячилар хатосидан фойдаланиб, ҳисобни қисқартирди, ўйинга қўшиб берилган дақиқаларда эса Энцо Фернандес қарши ҳужумни ғалаба голи билан якунлади. Аргентиналиклар камбэк учун 13 дақиқа сарфлашди – бу ҳам жаҳон чемпионати тарихига рекорд сифатида кирди.

Мессининг ўзи голлари сонини саккизтага еткзади ва турнир тўпурарлари рўйхатида биринчиликни ўзига қайтарди, Килиан Мбаппе, Эрлинг Ҳоланд (иккисида ҳам 7 тадан) ва Ҳарри Кейн (6) уни таъқиб қилишда давом этади. Бунинг ўзи ҳам алоҳида пойгага айланди: турнирда илк бор бирданига уч нафар футболчида 7 ва ундан ортиқ гол бор.

Месси шу куни жаҳон чемпионатидаги энг яхши тўпурар (21) сифатида кўрсаткичини яхшилаб олди (энг яқин таъқибчиси Мбаппеда 19), шунингдек, ўз ватандоши Марадонани ортда қолдирган ҳолда жаҳон чемпионатидаги энг яхши ассистентга (9) айланди. Бундан ташқари, у жаҳон чемпионатларида энг кўп ўйин ўтказган (31) футболчи, жаҳон чемпионатларида қаторасига 9 ўйинда гол урган илк футболчи (ҳеч кимда 7 та голлик серия ҳам йўқ) ва жаҳон чемпионати плей-офф босқичларида қаторасига 6 ўйинда гол урган илк футболчи ҳисобланади.

Табиийки, ўйин ҳакамлик можаросисиз кечмади. Франциялик бош ҳакам Франсуа Летексе ҳужум бошланишидаги фол туфайли мисрликларнинг 60-дақиқадаги голини бекор қилди, 90+2-дақиқада эса аргентиналиклар жарима майдони ичидаги фолни инобатга олмади.

Натижада Африка вакиллари турнирни тарк этишда ФИФА ва ҳакамларни кескин оҳангда танқид қилишди.

«Ҳакам бизни мағлуб қилиш учун майдонга тушганди. Биз Миср халқини хурсанд қилишга умид қилгандик, аммо охир-оқибат Аргентинани жаҳон чемпионатидаги ғалабаси билан табриклаймиз. Бу сохта турнир ва энди улар қолган ўйинларни ўйнашлари ҳам шарт эмас. Ҳакам бутун бир миллатнинг орзусини барбод қилди ва у бизни нишонга олди, чунки биз Аргентинани мағлуб этмаслигимиз керак эди. Энди худо олдида жавоб берсин», – деди Зико.

Аргентинада эса ҳакамликка ҳеч қандай эътироз йўқ. Қувонч кўз ёшларини тўккан Месси ўз жамоадошлари характер кўрсатганини эътироф этди.

«Тўғрисини айтсам, биз юришимизни давом эттиришимиз, буни қандай уддалаганимизни ҳисобга олсак, бу катта бахт. Ҳисоб 0:2 бўлгач, вазият анча мураккаблашганди. Ўйинни ўзгартира олганимиздан ақл бовар қилмас ҳис-туйғуларни ҳис қиляпмиз. Бизга яна жуда қийин бўлди, лекин бу жаҳон чемпионати. Барча ўйинлар айнан шундай кечади. Бу ерда барча жамоалар тенг. Мен жуда бахтиёрман», – дея тан олди Месси журналистлар билан мулоқотда.

Колумбия уйга қайтди

Швейцария – Колумбия 0:0
Пеналтилар серияси: Кинтеро – (0:1). Жака – (1:1). Санчес – (1:1)(тўсин). Амдуни – (2:1). Кампас – (2:2). Аканжи – (2:2)(хато). Эрнандес – (2:2)(дарвозабон). Иттен – (3:2). Диас – (3:3). Рубен Варгас – (4:3)
Швейцария: Кобел, Элведи, Аканжи, Родригес (Муҳайм, 71), Закариё (Видмер, 87), Фройлер, Жака, Яшари (Соу, 46), Ндой (Рубен Варгас, 90+2), Ридер (Амдуни, 103), Эмболо (Иттен, 87)
Колумбия: К. Варгас, Лукуми (Мина, 119), Санчес, Моҳика, Мунос, Пуэрта, Лерма (Риос, 82), Диас, Ариас (Кинтеро, 66), Хамес Родригес (Кампас, 66), Суарес (Эрнандес, 82)
Огоҳлантиришлар: Жака, 51. Закариё, 59. Муҳайм, 105 – Суарес, 60. Санчес, 95

Аргентина ва Миср ўртасидаги адреналинли ўйиндан кейин Швейцария ва Колумбия ўртасидаги ўйинни томоша қилиш мухлислар учун азобга айланди. Биринчи бўлимда жамоалар деярли ҳужум қилишмади ва шунчаки вақт ўлдириш билан машғул бўлишди.

Дастлабки 45 дақиқаликдаги асосий ҳайлайт эса трибунада ўтирган Юрген Клопп картошка фриси тановул қилаётгани кўрсатилган кадр бўлди. Бу ҳолат ижтимоий тармоқларда майдондаги воқеалардан фаолроқ муҳокама қилинди.

Иккинчи бўлимда ҳам вазият деярли ўзгармади – жамоалар бир-бирини деярли безовта қилишмади. Фақат қўшимча бўлимларда колумбияликлар ташаббусни қўлга олишди, аммо ўз имкониятларидан фойдалана олишмади ва барибир ҳисоб очилмай қолди.

Пеналтилар сериясида ҳам швейцарлар ва колумбияликлар амалда бир хил ҳаракат қилишди. Санчеснинг тўсинга борган зарбасига европаликлар Аканжининг хатоси билан жавоб қайтарди. Аммо абадий бундай давом этиши мумкин эмасди ва Швейцария посбони Грегор Кобел Кучо Эрнандеснинг зарбасини қайтарди, Колумбия посбони Камило Варгас сейв қила олмади.

Натижада Швейцария 1954 йилдан буён илк бор мундиал чоракфиналига чиқди ва яримфинал учун Аргентинага қарши ўйнайдиган бўлди, турнир давомида атиги битта гол ўтказган (Ўзбекистон билан ўйинда Аббосбек Файзуллаевдан) колумбияликлар эса уйга қайтади.

Мартинес Португалияни тарк этди

Жаҳон чемпионатида истеъфолар паради давом этмоқда. Турнир 1/8 финалида Испаниядан учралган мағлубиятдан кейин (0:1) Португалия бош мураббийи Роберто Мартинес ҳам жамоани тарк этди. У бундай бўлишини режалаштирмагани, аммо энди бошқа йўл қолмаганини айтган.

«Ушбу қарор жаҳон чемпионатидан олдин қабул қилинганмиди? Йўқ, у узил-кесил тасдиқланган деб ўйламайман. Мен Португалияга жаҳон чемпионатида ғалаба қозониш учун келгандим ва ўйлайманки, ғалабасиз давом эттиришнинг маъноси йўқ. Энди директорлар кенгаши ва президент янги мураббийни танлаш имкониятига эга. Президент ҳар доим мени қўллаб-қувватлаган, лекин шартномам бугун тугайди. Бошқа айтадиган гапим йўқ», – дейди Мартинес.

Испаниялик ушбу мутахассис Португалияни 2023 йилда қабул қилиб олганди, аммо жамоа билан ҳеч қандай соврин юта олмади.

Бу жаҳон чемпионатида қатнашган жамоаларда саккизинчи истеъфо бўлди: Тунис гуруҳ босқичининг биринчи туридан кейиноқ Сабри Лямушига жавоб берганди. Гуруҳ босқичи якунланганидан кейин Ҳен Мен Бо (Жанубий Корея), Стив Кларк (Шотландия) ва Мирослав Коубек (Чехия) истеъфога чиқди. Плей-оффдаги натижалардан кейин Роналд Куман (Нидерландия), Себастян Беккасесе (Эквадор) ва Юлиан Нагелсманн (Германия) ҳам лавозимини тарк этганди.

Мбаппенинг сенатор билан айтишуви давом этмоқда

Селеста Амариля Килиан Мбаппега ҳамла қилишда давом этмоқда. Парагвайлик ушбу сенатор аёл ўз мамлакати миллий жамоаси «Учранглилар»га ютқазиб, турнирни тарк этганидан кейин футболчини «калондимоғ ва бадбашара», шунингдек «ўзини француз қилиб кўрсатадиган камерунлик» деб атаганди. Унинг постида ирқчилик руҳидаги бошқа кескин сўзлар ҳам бор эди. Бунга жавобан Мбаппе уни «жирканч аёл» деб атади ва бу Амарилянинг навбатдаги заҳарли сўзларига сабаб бўлди.

«Сенинг такаббурлигинг ва нафратинг ўйиндан олдин ушбу сўзларни айтганингдаёқ мени ғазаблантирганди: «Агар қўлимизни ахлатга тиқишга тўғри келса, тиқамиз». Биз аҳмоқ эмасмиз. Биз сен «ахлат» деганда Парагвай миллий жамоаси ва умуман барча парагвайликларни назарда тутганинг аниқ. Кейин эса сен улар «макияжини олиб ташлашди» дединг. Буни ҳам тушундик, сиз – макияжли элегантлар, биз эса – макияж нималигини ҳам билмайдиган қашшоқ, қўпол одамлармиз. Бутун Парагвай, жумладан, мен ҳам буни шундай қабул қилдик. Биз бу сўзларни ичимизга ютдик.

Энди мен сен ўз сўзларингни қайтариб олишинг ва мендан узр сўрашингни талаб қиламан. Мен ҳам сенинг зўравонлигингга тоқат қилмоқчи эмасман. Сен мени танимайсан, менинг кимлигимни билмайсан ва мени ўз лавозимига нолойиқ жирканч аёл деб айтишга ҳаққинг йўқ... Сўзларингни қайтариб ол, француз фуқаролигинга ҳурмат кўрсат ва узр сўра. Акс ҳолда, мен гендер зўравонлиги бўйича суд жараёнини бошлашим мумкин», – дея ёзган сенатор ижтимоий тармоқда.

Амарилянинг сўзлари дипломатик можарога сабаб бўлишига бир бахя қолди – Франция ҳукумати ушбу сиёсатчини ирқчилик учун қоралади, маҳаллий футбол федерацияси эса прокуратурага мурожаат қилмоқчи. Ҳозирча оқибатлар кузатилмади – Парагвай ҳукумати ҳам сенаторни қоралади.

Викинглар шамоллаб қолди

Викинг бўлиш дегани доим ҳам соғ бўлиш дегани эмас. Норвегия миллий жамоаси бош мураббийи Столе Солбаккен бир неча футболчиси шамоллагани ҳақида хабар берди.

«Бизда фақат Йерген Ларсеннинг тана ҳарорати кўтарилган, лекин бошқаларда ҳам йўтал ва хириллаш бор. Барчасига кондиционерлар, парвозлар, кийим алмаштириш хонасидаги ҳолатлар сабаб. Бизда 50 дан ортиқ одам бор, бундай ҳолатда кимдир шамоллаб қолмаслиги имконсиз эди», – деган Солбаккен.

Энди мураббийлар штаби асосий футболчиларнинг соғлиги ҳақида қайғуриши керак – 12 июл куни жамоани чоракфиналда Англияга қарши ўйин кутмоқда.