Монеточкага Россияда бир йиллик колония жазоси тайинланди

Москва суди Литвада яшаётган россиялик хонанда Елизавета Гирдимовани (Монеточка) «чет эл агенти» тўғрисидаги қонун талабларини бажармаганликда айбдор деб топди. Суд унга сиртдан бир йиллик умумий тартибдаги колония жазосини тайинлади.

Фото: AP

Москва прокуратураси маълум қилишича, суд қўшиқчи Елизавета Гирдимова, саҳнадаги номи Монеточка билан танилган хонандани, «чет эл агенти» сифатидаги мажбуриятларни бажармаганликда айбдор деб топган.

Маълумотларга кўра, хонанда бир йил давомида икки марта «чет эл агент»лари фаолияти тартибини бузгани учун маъмурий жавобгарликка тортилган. Шунга қарамай, у ижтимоий тармоқларда ўз материалларини қонунчиликда белгиланган «чет эл агенти» белгисини қўймасдан тарқатишда давом этган.

Суд қарорига мувофиқ, Монеточка бир йил муддатга умумий тартибдаги колонияга ҳукм қилинди. Шунингдек, унга уч йил давомида интернет сайтлари ва бошқа онлайн ресурсларни бошқариш ҳам тақиқланди.

Ҳукм сиртдан чиқарилган. Чунки хонанда ҳозирда Литвада истиқомат қилади, Россияда эса қидирувга берилган.

Монеточка 2025 йил октябр ойида ҳам «чет эл агенти» талабларини бажармаганлик бўйича сиртдан ҳибсга олинган эди. Кейинчалик, ўша йилнинг ноябр ойида унга 50 минг рубл миқдорида жарима ҳам тайинланган.

Хонанда Россиянинг Украинага қарши урушига очиқчасига қарши чиққанидан сўнг мамлакатни тарк этиб, турмуш ўртоғи билан бирга Литвага кўчиб ўтган. Россия Адлия вазирлиги уни 2023 йил январ ойида «чет эл агент»лари реестрига киритган.

2024 йил июн ойида Москва прокуратураси Монеточка, актриса Яна Троянова ҳамда тарихчи Тамара Эйделманга нисбатан жиноят иши қўзғатишни талаб қилган. Шу йилнинг сентябрида хонандага нисбатан расман жиноят иши очилган, октябр ойида эса у қидирувга берилган.