Синнер иккинчи марта кетма-кет Уимблдон чемпиони бўлди

Германиялик теннисчи Александр Зверев Уимблдон–2026 турнири финалида жаҳоннинг биринчи рақами, италиялик Янник Синнерга мағлуб бўлди. Бу Зверевнинг «Катта дубулға» турнирлари финалларидаги тўртинчи мағлубияти бўлди.

Фото: REUTERS

Уимблдоннинг эркаклар ўртасидаги ҳал қилувчи баҳси 12 июл куни Лондонда бўлиб ўтди. Тўрт сет давом этган учрашувда Янник Синнер ғалаба қозониб, ўз фаолиятидаги иккинчи кетма-кет Уимблдон чемпионлигини қўлга киритди.

Финал кескин ва муросасиз кураш остида ўтди. Илк икки сетда ҳар икки теннисчи ишончли ҳаракат қилди. Биринчи сет тақдирини ҳал қилган тай-брейкда Зверев устун келган бўлса, иккинчи сетда худди шундай вазиятда Синнер муваффақият қозонди.

Учинчи сет ўртасида Александр Зверев майсали қопламада йиқилиб, тиззасини шикастлаб олди. Шундан сўнг у муҳим очкони бой берди ва рақибига брейк қилиш имконини тақдим этди. Натижада сет 3:6 ҳисобида Синнер фойдасига ҳал бўлди.

Тўртинчи сетда ҳам италиялик теннисчи ҳал қилувчи брейкни амалга ошириб, 6:4 ҳисобида устун келди ва чемпионликни қўлга киритди. Бу Синнернинг фаолиятидаги бешинчи «Катта дубулға» соврини бўлди. Шу вақтгача у йирик турнирлар финалида атиги икки марта мағлубиятга учраган.

Ушбу учрашувдан кейин Синнер ва Зверевнинг «Катта дубулға» турнирларидаги ўзаро ҳисобида италияликнинг устунлиги 4:2 кўринишига келди. 2025 йилда Австралия очиқ чемпионати финалида ҳам Синнер Зверевни мағлуб этган эди.

29 ёшли Александр Зверев ўз фаолиятида бешинчи марта «Катта дубулға» турнири финалида майдонга тушди. Бироқ у шуларнинг тўрттасида мағлуб бўлди. Бундан аввал у 2020 йилда US Open финалида австриялик Доминик Тимга, 2024 йилда эса «Ролан Гаррос» финалида испаниялик Карлос Алкарасга ютқазган эди.

Шунга қарамай, Зверев жаҳон рейтингида учинчи ўринни сақлаб қолмоқда. Унинг Карлос Алкарас билан очколар бўйича фарқи катта эмас. Уимблдон якунлари бўйича эълон қилинган вақтинчалик рейтингда эса германиялик теннисчи иккинчи ўринга кўтарилган.

Зверев жорий йил июн ойида Париждаги «Ролан Гаррос» турнирида ғолиб чиқиб, сўнгги 30 йил ичида Германияга «Катта дубулға» чемпионлигини келтирган илк теннисчига айланган эди. Унгача бу натижага 1996 йилда афсонавий теннисчи Борис Беккер эришган.

Шунингдек, Александр Зверев Германия тарихида «Катта дубулға»нинг барча тўрт турнири финалига чиққан ягона теннисчи ҳисобланади.

Аёллар ўртасидаги Уимблдон–2026 финалида эса чехиялик Линда Носкова ўз ҳамюрти Каролина Муховани мағлуб этиб, чемпионликни қўлга киритди.