ЖЧ кундалиги. Аргентинада яна камбэк, финалда 30 дақиқалик танаффус

Аргентина – жаҳон чемпионати финалида. Лионел Скалони шогирдлари Англияга қарши ўйиннинг сўнгги дақиқаларида ирода кўрсатиб, ғалаба қозонди (2:1). Энди «Албиселеста» финалда Испанияга қарши майдонга чиқади.

Футбол майдонларидан ташқарида ҳам қизиқарли воқеалар бўлиб ўтмоқда: французлар ҳимоячиси Люка Дин нафрат тўлқинига дуч келди, Килиан Мбаппе эса ҳимояга ёрдам беришда энг ёмон футболчи деб топилди.

Буюк камбэк

Англия – Аргентина 1:2
Голлар: Гордон, 55 (1:0). Фернандес, 85 (1:1). Л. Мартинес, 90+2 (1:2)
Англия: Пикфорд, Стоунс (Рэшфорд, 90+6), Гейи, Спенс (Тони, 90+6), Жеймс (О`Райли, 82), Райс (Бёрн, 82), Андерсон, Беллингҳэм, Гордон (Конса, 72), Роджерс, Кейн
Аргентина: Э. Мартинес, Л. Мартинес (Монтиэл, 72), Ромеро, Молина (Отаменди, 72), Таляфико (Л. Мартинес, 81), Паредес (Гонсалес, 64), Макаллистер, Фернандес, Симеоне (де Паул, 72), Алварес, Месси
Огоҳлантиришлар: Андерсон, 37 – Л. Мартинес, 42. Ромеро, 51. де Паул, 90

«Биз уни юз фоизга зарарсизлантира олмаслигимизни жуда яхши тушуниб турибмиз... аммо биз бир йўлини қиламиз», – деганди ўйиндан олдин Англия миллий жамоаси бош мураббийи Томас Тухел Лионел Месси ҳақида.

Германиялик мутахассиснинг режаси аввалига чиндан ҳам иш берди – инглизлар биринчи бўлимда тактик фоллар ва эҳтиёткорона ўйин билан Мессини ҳам, бутун Аргентинани ҳам тийиб турди. Ва ўзини ҳам
– яримфиналнинг биринчи бўлими хавфли вазиятлар билан эмас, хавфли ҳаракатлар билан ёдда қолди. Буни яққол ифодалайдиган оддий факт: дастлабки ярим соат мобайнида жамоалар бирор марта ҳам дарвоза томон зарба беришмади. Opta маълумотига кўра, бу жаҳон чемпионати тарихида илк бор шундай бўлиши.

Аммо иккинчи бўлимда вазият ўзгарди. Инглизларнинг 55-дақиқада уюштирган голли ҳужуми ўйинни очиб юборди – Энтони Гордон Морган Роджерс қанотдан узатган тўпни яқин масофадан дарвоза тўрига киритиб юборди.

Ўтказиб юборилган гол аргентиналикларни олдинга чиқишга мажбур қилди – улар рақиб дарвозаси томон тез-тез яқин боришди ва Жордан Пикфордни бир неча бор қаҳрамонлик кўрсатишга мажбур қилди.

Скалони футболчиларни алмаштириш орқали ҳужум чизиғини кучайтирди, Тухел эса олдинги чизиқ вакиллари ўрнига ҳимоячиларни туширди. 

Пикфорд охиригача туриб бера олмади. 85-дақиқада Лионел Мессидан тўпни қабул қилиб олган Энцо Фернандес жарима майдони ташқарисидан қайтариб бўлмас зарба йўллади – таянч зонасида уни ҳеч ким қарши олмади, бу позицияни ёпиши керак бўлган Деклан Райс икки дақиқа олдин захирага олинганди.

90+2-дақиқада эса 39 ёшли аргентиналик ғалаба голига ҳам узатма берди – унинг ўнг қанотдан узатмаси дарвоза чизиғи олдида бўш қолдирилган Лаутаро Мартинеснинг бошига етиб борди.

Англия қолган дақиқаларда вазиятни ўзгартира олмади, аргентиналиклар сўнгги дақиқаларда ҳам кучли босим уюштиришди ва ғалабали ҳисобни ушлаб қолишди. «Албиселесте» бу сафарги турнир плей-оффида ҳар сафар сўнгги дақиқаларгача мухлисларини ҳаяжонда ўтиришга мажбур қилмоқда: Кабо-Верде, Миср ва Швейцарияга қарши ўйинларда ҳам барчаси ўйин охиридаги голлар эвазига ҳал бўлганди. Испания ҳам финалда ҳакам ҳуштаги чалинмагунича бўшашмаслиги талаб этилади.

Финалда 30 дақиқалик танаффус бўлади

ЖЧ-2026 аллақачон тарихдаги энг ноодатий турнирга айланди – 48 иштирокчи жамоадан тортиб кулинг бреклар орқали ўйин тўрт бўлимга бўлиб ташланганигача. Турнир финали ҳам ноодатий кўринишда бўлади – биринчи бўлимдан кейин стандарт 15 дақиқалик танаффус ўрнига ярим соатлик концерт уюштирилиши режалаштирилмоқда.

Бу концертда Жастин Бибер, Мадонна, Шакира ва жанубий кореяликларнинг BTS поп-гуруҳи чиқиш қилиши кутилмоқда. Маросим ташкилотчиси Coldplay гуруҳи солисти Коул Мартин бўлади.

Бир қарашда америкача услубдаги шоу (АҚШда танаффусларда концерт беришни яхши кўришади) қизиқарли кўринса-да, у расман ФИФА қоидаларини бузади.

«Агар чиндан ҳам шундай йўл тутилса, ўйин қоидалари бузилади. Қоидада «футболчилар икки бўлим ўртасида 15 дақиқадан ошмайдиган танаффус қилиш ҳуқуқига эга»лиги ҳақида ёзилган. Мусобақа регламентида бўлимлар орасидаги танаффус давомийлиги кўрсатилиши шарт ва у фақат ҳакам рухсати билан ўзгартирилиши мумкин. ЖЧ-2026ни тартибга солувчи ҳужжатда ҳам фақат 15 дақиқалик танаффус ҳақида сўз кетган», – дея ёзади «СЭ» нашрининг ҳакамлик бўйича эксперти Александр Бобров.

Бошқа томондан, бу жаҳон чемпионатида ўз қоидаларини бузиш – аллақачон ФИФА учун анъанага айланган.

«Узурпатор қароқчилар»

Навбатдаги сиёсий можаро ҳам рўй берди. Англияга қарши яримфинал ўйини арафасида Аргентина вице-президенти Виктория Вилярруэл эстафета таёқчасини қабул қилиб олди. У европаликларни «узурпатор қароқчилар» деб атаган.

«Бу оддий ўйин эмас. Эртага қароқчиларга қарши ўйнаймиз. Мен толерантлик қилмайман ва вазмин бўлмайман: инглизларга қарши ўйин – ҳар доим каттароқ бўлади. Малвин ороллари, Диего Марадона, Леонинг сўнгги турнири ва босқинчиларни тўхтатиш имконияти. Олға, Аргентина! Чунки охирги нафасимизгача ўзимизникини талаб қиламиз!» – дея ёзган Вилярруэл ижтимоий тармоқда.

Маълумот учун, Аргентина ва Буюк Британия муносабатлари 1982 йилда Фолкленд уруши туфайли ёмонлашганди – шу номли орол учун икки ойдан ортиқ вақт давомида ҳарбий ҳаракатлар олиб борилган ва бу икки томондан юзлаб ҳарбийларнинг ўлимига сабаб бўлган. Можаро якунида Фолкленд ороли (Аргентинада – Малвин ороли деб номланади) Буюк Британия таркибида қолган ва ҳозиргача мамлакатлар ўртасида, асосан футбол майдонларида, кескин қарама-қаршилик давом этмоқда. Бу галги тўқнашувни «Албиселесте» ўз фойдасига ҳал қилди ва ўйиндан кейин футболчилар аргентиналик мухлислар олиб келган, «Малвин ороли – Аргентинаники» деб ёзилган баннерни стадионга олиб тушишди ва унинг фонида суратга тушишди.

Мбаппе – ЖЧнинг ҳимояланишда энг ёмон футболчиси

Франция миллий жамоаси сардори Килиан Мбаппега жаҳон чемпионати яримфиналида Испанияга қарши кечган ўйиндаги мағлубиятдан (0:2) кейин илк танқид тошлари кела бошлади. FotMob порталига кўра, ушбу форвард турнирнинг ҳимоявий ҳаракатларда иштирок этиш бўйича энг ёмон футболчиси бўлган. Агар статистикага ишонилса, 27 ёшли француз етти учрашув мобайнида фақат бир марта жамоадошларига ҳимояда ёрдам берган ва бу борада сўнгги 602-ўринни эгаллаган.

Килианни дангаса деб бўлмайди – нима бўлганда ҳам у турнир давомида саккизта гол урди. Шу билан бирга, мураббийлар бу статистик кўрсаткични инобатга олиши тайин.

Дин ватан хоинига чиқарилди

Чемпионлик учун курашдан чиқилгач, бошқа бир француз футболчиси – ҳимоячи Люка Дин ҳам танқидлар ёмғири остида қолди. Аниқроғи, уни шунчаки танқид қилишмаяпти, балки чинакамига таъқибга олишган – ушбу футболчи Испанияга қарши ўйин тақдирини ҳал қилган пеналтига сабабчи бўлганди. Натижада Диннинг ижтимоий тармоқлардаги саҳифалари ирқчилик руҳидаги изоҳлар билан тўлиб кетди, уни «оқ ахлат» деб аташмоқда.

«Сен жамоадаги ягона оқ танли эдинг ва биз сен туфайли ютқаздик», – дея ёзган ҳейтерлардан бири.

Диннинг таъқиб қилинишини глобал миқёсда қоралаш ҳали кузатилмаяпти. Бу аллақачон баъзи сиёсатчиларнинг ғашига тегмоқда – Франция Миллий мажлиси аъзоси Жюлен Одул матбуотни икки томонлама стандартларда айблади.

«Агар худди шу жирканч изоҳлар шартли Усмон Дембелага қаратилганида, ирқчиликка қарши жамоатчилик ҳайқириқ ва фарёд билан шовқин кўтарган бўларди. Аммо гап Дин ҳақида борар экан, мутлақо сукут сақланади, чунки оқ танлиларга нисбатан ирқчилик уларни қизиқтирмайди. Шармандалик», – дея ёзган Одул ижтимоий тармоқда.

Кейинги ўйинлар

Жаҳон чемпионатида иккита ўйин қолди – иккиси ҳам медаллар учун

20 июлга ўтар кечаси, 02.00. Франция – Англия, 3-ўрин учун ўйин

21 июлга ўтар кечаси, 00.00. Испания – Аргентина, финал