Apple яна дунёнинг энг қиммат компаниясига айланди

Apple компанияси капиталлашув бўйича график процессорлар ишлаб чиқарувчи Nvidia компаниясидан ўзиб кетди.

Фото: Adam Gray/Bloomberg

Bloomberg хабарига кўра, Apple компанияси капиталлашув бўйича график процессорлар ишлаб чиқарувчи Nvidia компаниясидан ўзиб кетди ва дунёнинг энг қиммат оммавий компаниясига айланди.

17 июль куни Nvidia акциялари 3,7 фоизга арзонлашди, оқибатда компаниянинг бозор қиймати 4,8 триллион долларгача тушди. Ўз навбатида, Apple акциялари 0,4 фоизга қимматлаб, компания капиталлашуви 4,9 триллион долларга етди.

Nvidia 2025 йилнинг май ойидан буён биржадаги энг қиммат компаниялар рейтингини бошқариб келаётган эди. Октябрь ойида унинг капиталлашуви беш триллион долларга етган.

Reuters нашрининг қайд этишича, энг қиммат компаниялар рўйхатида етакчининг ўзгариши инвесторлар эътиборини Nvidia каби «сунъий интеллект бумининг энг яққол бенефициарлари» доирасидан ташқарига кенгайтира бошлаганидан далолат беради. Таҳлилчиларнинг сўзларига кўра, Apple ўз моделларини ривожлантиришга маблағ сарфламагани учун сунъий интеллект пойгасида ортда қолаётган ҳисобланарди, бироқ энди «кайфият ўзгарган».

«Apple <…> сунъий интеллектни сервислари орқали монетизация қилиш, фойдаланувчиларни ўз экотизимига боғлаш ва ускуналарни янгилаш учун анча қулайроқ мавқега эга. Қайта баҳолаш сунъий интеллект билан боғлиқ спекулятив ўсишни эмас, балки [компания] даромадининг барқарорлигига бўлган ишончни акс эттиради», деб таъкидлади BRI Wealth Management инвестиция бўлими раҳбари Тони Медоуз.