Зарафшон шаҳар ҳокими 2021 йилнинг апрель-май ойларида 59 нафар фуқарога фармойиш асосида шаҳар ҳудудидан хизмат кўрсатиш шохобчаларини ўрнатиш учун вақтинча ер участкалари тақдим этган. Фуқаролар ушбу ер участкаларида белгиланган хизмат кўрсатиш турлари бўйича тадбиркорликни йўлга қўйиш учун ҳаракатни бошлаб юборишган. Аммо Зарафшон шаҳар прокуратураси ҳокимнинг мазкур фармойишларини қонунчиликка тўғри келмайди, дея ҳисоблаганди.
Прокуратура Ер кодексининг 23-моддасига асосан ер участкаларини эгалик қилиш, фойдаланиш учун, ижарага ва мулк қилиб бериш (реализация қилиш) ер ажратиш тариқасида амалга оширилишини таъкидлаб, ҳокимлик фармойиш асосида ер майдонидан фойдаланишга имкон яратган, деган важни илгари сурганди. Суд қарорига кўра, шаҳар ҳокимининг фармойиши билан фуқароларга ер ажратилмаган, аксинча 5 йил муддатга енгил конструкцияли савдо дўконлари ва хизмат кўрсатиш шохобчаларини ўрнатишга рухсат берилган.
Шунингдек, судлов ҳайъати аризачининг ҳокимлик мазкур масалада қарор қабул қилмасдан фармойиш чиқарганлиги қонун талабларига зид ҳисобланиши, Ер кодексининг 20-моддаси нотўғри талқин қилиниб, моддий ҳуқуқ нормалари бузилганлиги ҳақидаги важларини ҳам рад қилди.
