Трамп Украинадаги вазият назоратдан чиқиб кетганини маълум қилди

АҚШ президенти Доналд Трамп Украинадаги вазиятни «бутунлай назоратдан чиқиб кетган» деб ҳисоблайди. Бу ҳақда у НАТОга аъзо давлатлар етакчиларининг ёпиқ мажлисида маълум қилди.

Bloomberg манбасининг сўзларига кўра, Трамп иттифоқчиларга буни нимадир қилиш кераклигини айтган. У ортиқча тафсилотларга тўхталмаган бўлсада, бу Украина учун ижобий сигнал сифатида қабул қилинган.

Трамп Киевга қўшимча Patriot ҳаво ҳужумидан мудофаа мажмуаларини топшириш имкониятини кўриб чиқишини маълум қилган. Унинг таъкидлашича, ушбу қуроллар АҚШнинг ўзига ҳам, Исроилга ҳам керак. Аммо у Украина учун имконият топилишига умид билдирган. Шу билан бирга, Трамп АҚШ Киевга ҳарбий ёрдам кўрсатишни давом эттириш ёки эттирмаслигига ойдинлик киритимаган.

Бундан ташқари, Трамп урушни 24 соат ичида тўхтатиш ваъдаси «сарказм» бўлганини маълум қилди. Унинг сўзларига кўра, Россия президенти Владимир Путин «жуда мураккаб инсон» ва Украина етакчиси Володимир Зеленский билан ҳам «муаммолар бўлган». Трамп ушбу уруш «бошқа барчаларидан қийинроқ бўлиб чиққанини» тан олди. У дунёдаги бошқа можаролар, жумладан, Эрон ва Исроил, Ҳиндистон ва Покистон, Сербия ва Косова ўртасидаги тўқнашувлар муваффақиятли ҳал этилганини билдирди.

Трамп яна бир бор Путин ростдан ҳам урушни якунлаш бўйича келишувга эришишга интилаётганига ишонч билдирди. «У мазкур вазиятдан чиқишни истаган бўларди. У учун бу тартибсизлик… Мен уни шунчаки чалкашиб қолган инсон деб ҳисоблайман. Аслида мен жуда ҳайратдаман. Биз барчасини осонликча ҳал этамиз деб ўйлагандим», — дейди АҚШ президенти.

Трамп яна бир бор Путин билан гаплашишга уринишини қўшимча қилди. Унинг сўзларига кўра, Зеленский ҳам 25 июн куни унга барчаси тезроқ якунланишини хоҳлаётганини айтган.