«Арсенал»да йирик ғалаба, «Барса» бугун чемпион бўлиши мумкин

Англия: Тиаго Ҳоланд билан пойгалашмоқда

«Брентфорд» – «Вест Ҳэм» 3:0
Голлар: Мавропанос, 15 – автогол (1:0). Тиаго, 54 – пеналти (2:0). Дамсгор, 82 (3:0)
«Брентфорд»: Келлеҳер, ван дер Берг, Коллинз, Люис-Поттер (Ҳики, 90+1), Кайоде, Йенсен, Ярмолюк, Дамсгор (Дасилва, 90+1), Шаде (Айер, 80), Уаттара (Фуро, 90), Тиаго
«Вест Ҳэм»: Ҳермансен, Дисаси, Мавропанос, Диуф (Траоре, 74), Уокер-Питерс (Ван-Биссака, 65), Фернандеш, Соучек, Саммервилл (Скарлз, 88), Боуэн (Магасса, 88), Пабло, Кастелянос (Уилсон, 65)
Огоҳлантиришлар: Кайоде, 73 – Кастелянос, 59. Саммервилл, 62. Скарлз, 90

Бу мавсумда АПЛда қолиш учун кураш чемпионлик титули учун курашдаги каби қизғин кечмаяпти. «Вулверҳэмптон» ва «Бёрнли» чемпионшипга тушиб кетиши аллақачон аниқ бўлган, мавсумнинг учинчи омадсиз жамоаси эса катта эҳтимол билан «Вест Ҳэм» клуби бўлади. Шанба куни ушбу жамоа «Брентфорд» майдонида иложсиз аҳволда қолди ва ҳозирда 18-ўринда турган «Тоттенҳэм»да турнир жадвалининг қуйи қисмини тарк этиш учун яхши имконият ҳосил бўлди. «Болғачилар» дарвозасига учта жавобсиз гол урган «асаларилар» еврокубоклар йўлланмаси учун кураш олиб бормоқда, жамоа тўпурари Игор Тиаго мавсумдаги саккизинчи пеналтини аниқ ижро этиб, тўпурарлар пойгасида Ҳоландни қуйишда таъқиб этмоқда. Ҳозирча бу пойгада норвегиялик ҳужумчи иккита гол олдинда (24:22), аммо бразилиялик ҳужумчи ҳозир пик формасида – у голларининг ярмини 2026  йилда урган ва бу борада ҳеч бир ҳужумчи унга тенг келолмайди.

«Арсенал» – «Фулҳэм» 3:0
Голлар: Йокереш, 9 (1:0). Сака, 40 (2:0). Йокереш, 45+4 (3:0)
«Арсенал»: Райя, Салиба, Габриэл Магаляйнс, Калафиори, Уайт (Москера, 83), Райс (Субименди, 64), Люис-Скелли, Эзе (Доуман, 78), Троссар, Сака (Мадуэке, 46), Йокереш (Габриэл Жезус, 64)
«Фулҳэм»: Лено, Басси, Андерсен, Робинсон, Кастан, Рид (Кэрни, 63), Лукич, Смит-Роу (Куси-Асаре, 78), Чуквуэзе (Кинг, 64), Уилсон (Бобб, 64), Хименес (Родригу Мунис, 73)
Огоҳлантириш: Лукич, 23

Чемпионлик пойгасида қатнашаётган «Арсенал» эса бу оқшом рақибни йирик ҳисобда мағлуб этиш учун майдонга тушганди ва буни биринчи бўлимдаёқ уддалади. Артета шу куни бошланғич таркибдаги танловлари билан кўпчиликни ажаблантирди. Биринчидан, сўнгги вақтларда мунтазам равишда илк дақиқалардан ўйнаб келган Инкапие захирада қолдирилди ва унинг ўрнини ҳужумкорлиги билан фарқ қиладиган Калафиори эгаллади. Иккинчидан, бу мавсумда топ-5 лигаларда энг кўп ўйнаган яримҳимоячи бўлиб турган Мартин Субимендига дам берилди. Учинчидан, унинг ўрнига таянч яримҳимоясига Райс ўтказилди, Декланнинг ўрнига эса чап қанот ҳимоячиси Люис-Скелли туширилди. Шу билан бирга, ҳужумнинг ўнг қанотида анча вақтдан буён жароҳатини даволаган Сака пайдо бўлди. Айнан Сака ва Скеллининг ҳаракатлари ўйин тақдирини ҳал қилди. Букайо ўз қанотида истаган ишини қилди ва унинг узатмасидан кейин Йокереш тезкор гол билан ҳисобни очди.

Кейин эса Саканинг ўзи швециялик ҳужумчининг узатмасини голга айлантирди. Артета уни сешанба оқшомида ЕЧЛ яримфиналида «Атлетико»га қарши кечадиган жавоб ўйини учун асрашга қарор қилиб, танаффусда захирага олди. Аммо у унга 45 дақиқа ҳам учта юбилей натижага эришиш учун етарли бўлди – 80 гол, 70 ассист ва 150 балл. Унинг майдонга тушиши Йокерешнинг ҳам ўйинини очиб юборди, у бўлим охирларида Троссарнинг узатмаси орқали дубл қайд этди. Бу унинг учун «Арсенал» сафида илк бор бир ўйинда 2+1 кўрсаткич қайд этиши бўлди. Шунингдек, Виктор Алексис Санчес давридан буён «Арсенал»даги илк мавсумида йигирмадан ортиқ гол урган (21) илк футболчига айланди.

Бу ўйин мезбонларнинг тўлиқ устунлигида ўтгани қуйидаги суратда яққол акс этган: «Арсенал» ҳимоя чизиғи шу қадар юқори жойлашганки, дарвозабон Давид Райя майдоннинг иккинчи қисмига келиб подкат амалга оширмоқда.

Бу ўйиндаги йирик ҳисобдаги ғалаба чемпионлик пойгасида қўл келиши мумкин, агар мавсум якунида «Арсенал» ва «Манчестер Сити»нинг очколари тенг келиб қолса, биринчи навбатда тўплар нисбатига қаралади. Ҳозирда «канонирлар» +4 кўрсаткичига эга ва кейинги рақиблар ҳам нисбатан осонроқ: «Вест Ҳэм» (18-ўрин), «Бёрнли» (19-ўрин) ва «Кристал Пэлас» (14-ўрин). «Сити»нинг қолган 5 рақибидан 3 таси еврокубоклар учун курашмоқда: «Эвертон» (11-ўрин), «Брентфорд» (6-ўрин), «Борнмут» (8-ўрин), «Кристал Пэлас» (14-ўрин) ва «Астон Вилла» (5-ўрин).

Испания: Симеоненинг 1000-ўйини ва ЕЧЛга чиққан «Вилярреал»

«Вилярреал» – «Леванте» 2:1
Гол: Микаутадзе, 38 (1:0). Эспи, 51 (1:1). Молейро, 62 (2:1). Микаутадзе, 68 (3:1). Бюкенен, 87 (4:1). Пепе, 90 (5:1)
«Вилярреал»: Тенас, Вейга, Наварро (Камбвала, 81), Педраса (Кардона, 74), Фримен, Парехо (Парти, 74), Комесаня, Молейро, Пепе, Ж. Морено (Бюкенен, 84), Микаутадзе, Перес
«Леванте»: Райан, М. Морено, Маттурро, Пампин, Толян, Арриага (Рагубе, 68), Оласагасти, Пабло Мартинес (Бруге, 77), Ромеро (Тунде, 46, Этта Эйонг, 68), Алварес (Лосада, 30), Эспи
Огоҳлантиришлар: Парехо, 45. Вейга, 55 – Арриага, 45

Мавсумнинг катта қисмида учинчи ўринни ўзида сақлаб турган «Вилярреал» бу турда «Леванте»ни йирик ҳисобда тор-мор этиб, валенсияликларнинг лигада қолиш имкониятларини амалда нолга тенглаштирди. Ўз навбатида, «субмариналар» бу ғалаба орқали қаторасига иккинчи мавсумда Чемпионлар лигаси умумий гуруҳ босқичида иштирок этишини кафолатлади. Марселино шогирдларида еврокубокнинг бу мавсумидаги муваффақиятсизликни тўғрилаш имкони бўлади. Шанба оқшомидаги ўйинни Микаутадзенинг дубли ҳал қилди, у аввалига рақиб ҳимоясидаги қўпол хатодан фойдаланди, кейин эса Пепенинг қанотдан узатмасини дарвоза тўрига тўғрилаб юборди. Ўтган ёзда «Лион»дан Испанияга кўчиб ўтган ушбу гуржистонлик ҳужумчи илк мавсумида барча турнирлар доирасида 13 гол уришга эришди.

«Валенсия» – Атлетико» 0:2
Голлар: Луке, 74 (0:1). Кубо, 82 (0:2)
«Валенсия»: Димитриевски, Таррега, Пепелу, Хосе Гайя (Васкес, 73), Саравия (Раба, 82), Родригес, Герра, Угринич (Дуро, 59), Риоха (Диего Лопес, 59), Содиқ, Рамазани (Груневелд, 73)
«Атлетико»: Муссо, Лангле, Ле Норман, Диас, Боняр (Пурич, 90+7), Мендоса (Коке, 73), Варгас, Морсилио (Луке, 63), Алмада (Гризманн, 73), Молина, Белаид (Кубо, 63)
Огоҳлантиришлар: Таррега, 67 – Алмада, 29. Мендоса, 52. Варгас, 61

«Атлетико» «Валенсия» учун ноқулай рақиб сифатидаги мақомини мустаҳкамлаб, қаторасига бешинчи ўзаро ўйинда ғалаба қозонди. Қолаверса, «матрасчилар» ўйиннинг биринчи бўлимида мезбонларга дарвоза соҳаси томон бирорта зарба беришга имкон қолдирмади, иккинчи бўлим охирида эса шу куни ла лигада дебют қилган икки ёш футболчи «кўршапалаклар» жамоасини нокаутга учратди. Диего Симеоне ЕЧЛ яримфинали доирасида Лондонга сафар олдидан асосий таркиб футболчиларига дам берганди ва ёш футболчилар тақдим этилган имкониятдан фойдаланишди.

Аввалига 20 ёшли форвард Луке ўз дебютини гол билан нишонлади, кейин эса 18 ёшли Мигел Кубо бу даражадаги илк ўйинини мадридликлар афсонаси Гризманнинг узатмаси орқали урган голи билан эслаб қоладиган бўлди. Француз ҳужумчи клублар даражасидаги 800-ўйинида навбатдаги голли ҳаракатини амалга оширди. Бу ўйин Симеоне учун ҳам юбилей эди, аргентиналик мутахассис шу куни мураббийлик фаолиятидаги 1000-ўйинини ўтказди. Шундай ўйинда жамоа тарихида 1984 йилдан буён кузатилмаган ҳолат қайд этилди: 42 йилдан буён «Атлетико» икки дебютантнинг икки голи билан ғалаба қозонмаганди.

«Осасуна» – «Барселона» 1:2
Голлар: Левандовски, 81 (0:1). Торрес, 86 (0:2). Раул Гарсия, 88 (1:2)
«Осасуна»: Эррера, Бойомо, Катена, Галан, Розе, Торро (Осамбела, 85), Монкайола (Барха, 85), Мойсес Гомес (Орос, 70), Моро, Р. Гарсия (Бретонес, 86), Будимир (Раул Гарсия, 70)
«Барселона»: Х. Гарсия, Кубарси, Мартин, Жоау Канселу, Э. Гарсия (Араухо, 82), Гави (де Йонг, 62), Педри (Бернал, 88), Олмо (Торрес, 62), Фермин Лопес, Баржи (Рэшфорд, 62), Левандовски
Огоҳлантиришлар: Монкайола, 74. Крус, 90 – Гави, 24. Э. Гарсия, 60

«Барселона»нинг вазияти жуда оддий – каталонияликлар шу турдаёқ майдондан ташқарида туриб чемпион бўлиши мумкин. Бунинг учун «Реал» якшанба куни «Эспанёл»га қарши ўйинда очко йўқотиши талаб этилади.

Аммо жамоа биринчи навбатда шанба куни Памплонада кечадиган ўйинда ғалаба қозониши талаб этиларди ва бу ҳар қандай рақиб учун осон иш эмас. Ўйиннинг биринчи бўлими «Осасуна» нафақат пешқадамнинг ҳужумларини қайтариб турди, балки ўзи ҳам хавфли қарши ҳужумлар уюштирди.

Ўйин картинаси иккинчи бўлимда ўзгара бошлади ва Рафиня ва Ямал каби етакчилар йўқ шароитда Рэшфорд кўп ишни ўз гарданига олди. Захирадан ўйинга қўшилган инглиз ҳужумчиси аввалига ўзи хавфли зарба берди, кейинроқ қанотдан Левандовскининг бошига ажойиб узатма берди. Ўтказиб юборилган голдан кейин мезбонлар тўлиқ куч билан олдинга ўтиб кетишди ва иккинчи голни ўтказиб юборишди – Фермин Лопес чизиқлар орасидан ўтказилган пас билан Ферран Торреснинг голига ассистентлик қилди. 

Икки гол устунлигидан кейин «Барса» футболчилари бироз бўшашди ва 88-дақиқада жарима майдонида ёлғиз қолдирилган Раул Гарсия мезбонларнинг ҳисобни қисқартирувчи голини урди.

Шунга қарамай, «Барселона» ла лигада қаторасига 10-ғалабасини нишонлади ва энди бугун «Реал» ва «Осасуна» ўйини қандай натижада якунланишини кутмоқда. Мадридликлар бугун сафардан ғалаба билан қайтадиган бўлса, «Барселона» кейинги ҳафтада бўлиб ўтадиган класикода чемпионликни расмийлаштириши мумкин.