Сешанба оқшомида Парижда «ПСЖ» ва «Бавария» ўртасида бўлиб ўтган ёрқин ўйиндан кейин кўпчилик Мадриддаги жуфтлик ўйини жуда зерикарли бўлишини ва ҳар икки жамоа ўта ҳимоявий тактика қўллашини тахмин қилаётганди. Амалда эса ўйинда ҳужумлар ва голли вазиятлар етарлича бўлди, фақат дастлабки яримфинал ўйинидан фарқли ўлароқ, бу ўйинда ҳимоячилар ва дарвозабонлар яхши ҳаракат қилишди, натижада жамоалар фақат пеналти орқали гол ура олишди.
«Атлетико» – «Арсенал» 1:1
Голлар: Йокереш, 44 - пеналти (0:1). Алварес, 56 - пеналти (1:1)
«Атлетико»: Облак, Ганцко, Пубил, Руджери, Лиоренте, Кардозо (Молина, 88), Коке, Лукман, Симеоне (Ле Норман, 46), Гризманн, Алварес (Баэна, 77)
«Арсенал»: Райя, Салиба, Габриэл Магаляйнс, Инкапие, Уайт (Москера, 86), Райс, Субименди, Эдегор (Эзе, 57), Мартинелли (Сака, 68), Мадуэке (Габриэл Жезус, 68), Йокереш (Троссар, 68)
Огоҳлантириш: Ганцко, 78
«Арсенал» ўйиндан олдин УЕФАдан «Метрополитано» стадионидаги майса баландлигини ўлчаб кўришни сўради. Майса баландлиги эса 26-30 миллиметр чиқди – бу нормадан юқори. Ўйин бошланганида эса мезбонлар майсани кўпроқ суғориб қўйишгани маълум бўлди – футболчилар майдонда тез-тез тойиб кета бошлашди.
Ўйиннинг катта қисми тенг курашлар остида кечди: мухлислар кўплаб зарбалар ва паслар блокланиши, тиғиз ҳимоя ва позицион ҳужумларга, шунингдек, стандарт вазиятларга гувоҳ бўлишди.
Биринчи бўлим охирларида «Арсенал» ҳисобда олдинга чиқиб олди. 42-дақиқада мадридликлар ҳимоячиси Давид Ганцко жарима майдони ичида Виктора Йокерешни ортдан туртиб йиқитди, швециялик форвард газонга қулади.
Ўйин бош ҳаками Данни Маккели 11 метрлик нуқтани кўрсатди ва жабрланувчининг ўзи Ян Облак дарвозаси томон қайтариб бўлмас зарба йўллади.
Виктор Йокереш биринчи бўлимда тўпга жами 10 марта тегинди (Opta маълумотига кўра, барчадан камроқ), аммо ўз мақсадига эришди. У ЕЧЛ яримфиналида гол урган илк швецияликка айланди. Златан Ибраҳимович чоракфиналдан кейинги босқичларда ура олмаган: 2010 йилда «Барселона» сафида «Арсенал» дарвозасига дубл қайд этган, «ПСЖ» сафида 2013 йилда «Барса» дарвозасига ва 2016 йилда «Сити» дарвозасига голлар урган.
Танаффусдан кейин эса мадридликлар ўйинни кучайтиришди ва вақти-вақти билан «Арсенал»ни жарима майдонига қамаб қўя бошлади. 56-дақиқада эса ҳисоб тенглашди – яна пеналтидан. Маркос Лиоренте жарима майдони ташқарисидан тўпни тўхтатмай зарба берди, тўп газондан аввал Бен Уайтнинг тиззасига, у ердан билагига борди.
