НАТО КХДР ҳарбийлари Россияга юборилганини тасдиқлади

«Иттифоқчилар Шимолий Корея қўшинларининг Россияга ўтказилишини тасдиқладилар, агар бу қўшинлар Украинадаги уруш учун мўлжалланган бўлса, бу Шимолий Кореянинг Россия томонидан олиб борилаётган ноқонуний урушни қўллаб-қувватлаши билан боғлиқ ҳолда вазиятнинг сезиларли даражада кескинлашганини англатади ва бу Россия фронтда катта йўқотишларга учраганининг яна бир далилидир», деди 23 октябр, чоршанба куни НАТО матбуот котиби Фараҳ Даҳлаллаҳ DW сўровига жавобан.

Унинг таъкидлашича, НАТО аъзолари ушбу масала бўйича алянс доирасида фаол маслаҳатлашмоқда ва Жанубий Корея ҳукумати билан вазиятни муҳокама қилмоқчи.

НАТО КХДРни Украинага қарши урушда қатнашишдан тийилишга чақирди

НАТО бош котиби Марк Рютте Шимолий Кореяни Украинага қарши урушда қатнашиш учун Россияга қўшин юбормаслик ҳақида огоҳлантирди. Бу «сезиларли кескинлашувни англатади», деб ёзди у 21 октябр куни X ижтимоий тармоғидаги саҳифасида.

Рюттенинг сўзларига кўра, у аллақачон Жанубий Корея президенти Юн Сук Ёл билан вазиятни муҳокама қилган, унга разведка етказган маълумотларга кўра, Шимолий Корея Россияга 1500 нафар аскарини юборган. Жанубий Корея разведкаси маълумотларига кўра, улар ҳозирда Россия шарқида тайёргарликдан ўтмоқда ва кейин Украинадаги фронт чизиғига жўнатилади.

Аввалроқ Жанубий Кореянинг Yonhap ахборот агентлиги ҳам разведка манбаларига таяниб, Пхенян фронтга «12 минг аскардан иборат тўртта бригада, жумладан, махсус кучлар бўлинмаларини» жўнатмоқчи эканини хабар қилган эди.

18 октябр куни Брюсселда бўлиб ўтган матбуот анжуманида ушбу маълумотларни изоҳлар экан, Рютте алянсда Шимолий Корея аскарларининг жанговар ҳаракатларда фаол иштирок этиши ҳақидаги тасдиқланган ахборот ҳалигача йўқлигини айтди. Бироқ у Пхеняндан Москвага қурол, технология ва янги ишланмалар кўринишида кенг кўламли ёрдам кўрсатилаётганига ишора қилди, бу эса Украина ҳамкорлари орасида хавотир уйғотмоқда.