Россия Украина ва АҚШ билан илк уч томонлама музокараларни ўтказади

Россия, АҚШ ва Украинадан иборат уч томонлама ишчи гуруҳнинг биринчи учрашуви 23 январ куни Абу-Дабида бўлиб ўтади.

Фото: РИА Новости

Бу ҳақда шу куни эрталаб РФ президенти ёрдамчиси Юрий Ушаков телефон брифингида маълум қилди. Брифинг Украинада тинчликка эришиш бўйича Доналд Трамп вакиллари билан РФ президенти Владимир Путин ўртасида бўлиб ўтган музокаралар якунларига бағишланган.

“Келишиб олиндики, бугун, яъни жума куни, 23 январда, Абу-Дабида хавфсизлик масалалари бўйича уч томонлама ишчи гуруҳнинг биринчи мажлиси бўлиб ўтади”, — деди Ушаков. Унинг баёноти ёзуви ТАСС давлат ахборот агентлиги сайтида эълон қилинган.

Ушаковнинг аниқлаштиришича, Россия делегацияси аллақачон шакллантирилган ва яқин соатлар ичида Амирликларга учиб кетади. Делегация таркибига РФ Мудофаа вазирлиги раҳбарияти вакиллари киради, уларга РФ ҚҚ Бош штаби Бош бошқармаси бошлиғи (2010 йилгача — Мудофаа вазирлиги Бош разведка бошқармаси, ГРУ) адмирал Игор Костюков бошчилик қилади.

Кремлда 23 январга ўтар кечаси ёпиқ эшиклар ортида бўлиб ўтган учрашувда АҚШ томонидан АҚШ президентининг махсус вакили Стив Уиткофф, Оқ уйнинг катта маслаҳатчиси Жош Грюнбаум, шунингдек Доналд Трампнинг куёви Жаред Кушнер иштирок этган.

2017 йил январидан 2021 йил январигача Трампнинг катта маслаҳатчиси лавозимида ишлаган Кушнер ҳозир АҚШ маъмуриятида расмий лавозимга эга эмас, бироқ у қайнотасига таъсирини сақлаб қолган ва Оқ уйнинг дипломатик ҳамда сиёсий ташаббусларида иштирок этади.

Жош Грюнбаум — АҚШ Умумий хизматлар маъмуриятидаги Федерал харидлар хизмати комиссари бўлиб, Трамп томонидан яқинда ташкил этилган “Тинчлик кенгаши”га катта маслаҳатчи этиб тайинланган, у музокараларда биринчи марта қатнашди.

Кремлдаги учрашувда Россия томонидан Путин ва Ушаковдан ташқари РФ президентининг махсус вакили, Россия тўғридан тўғри инвестициялар жамғармаси (РТИЖ) бош директори Кирилл Дмитриев ҳам қатнашган. Юрий Ушаковнинг айтишича, “музокаралар тўрт соатдан ортиқ давом этди ва жуда мазмунли, конструктив, ниҳоятда очиқ ва ишончли руҳда ўтди”.

Ушаковнинг сўзларига кўра, Уиткофф ва Кушнер Давосда бўлиб ўтган алоқалар, жумладан Трампнинг Зеленский билан учрашувидан олган таассуротлари билан ҳам ўртоқлашган.

У, шунингдек, Абу-Дабида иқтисодий масалалар бўйича икки томонлама — Россия–АҚШ гуруҳи раҳбарлари Стив Уиткофф ва Кирилл Дмитриевнинг ҳам учрашуви бўлишини айтди.