ЕИ ва Австралия божларнинг 99 фоиздан ортиғини бекор қилади

Европа Иттифоқи ва Австралия эркин савдо тўғрисидаги битимни тузиш бўйича музокараларни якунлади. Бу ҳақда сешанба, 24 март куни Европа комиссияси раиси Урсула фон дер Ляйен ва Австралия бош вазири Энтони Албанезе маълум қилди.

2018 йилдан буён ишлаб чиқилаётган мазкур келишув ҳар икки томон учун божхона тўловлари каби савдо тўсиқларини бекор қилишга қаратилган.

“Бугун биз дунёга муҳим бир нарсани айтмоқдамиз — тубдан ўзгариб бораётган, йирик давлатлар тарифлардан босим воситаси сифатида, таъминот занжирларидан эса заиф нуқта сифатида фойдаланаётган дунёга”, — деди фон дер Ляйен Канберрада журналистларга.

“Бизда қоидаларга асосланган очиқ савдо ижобий натижа беради”, — дея таъкидлади Еврокомиссия раҳбари.

Албанезе эса бу битимни Австралия учун “муҳим лаҳза” деб атади.

Савдо келишуви ҳозирча кучга киргани йўқ. Уни Европа Иттифоқига аъзо давлатлар, Европарламент, шунингдек Австралия парламенти маъқуллаши керак. Шундан сўнг томонлар уни имзолаши мумкин. Бу тартиб Европа комиссияси ва Австралия ташқи ишлар савдо идораси материалларида ҳам қайд этилган.

Савдо келишуви Европа Иттифоқидан Австралияга экспорт қилинадиган товарларга қўйилган божларнинг 99 фоиздан ортиғини бекор қилишни назарда тутади.

Брюссел маълумотларига кўра, бу Европа бизнесига ҳар йили божлар ҳисобига тахминан 1 миллиард еврони тежаш имконини беради. Бундан ташқари, ЕИ компаниялари учун Австралиядаги давлат харидлари соҳасига кириш осонлашади.

Ўз навбатида, Австралия Европа учун стратегик аҳамиятга эга муҳим хомашёни ишончли етказиб беришни таъминлаши ва улар импортига тарифларни пасайтириши кутилмоқда.

Европа комиссияси маълумотига кўра, мазкур келишувдан энг кўп машинасозлик, кимё, автомобилсозлик ва қишлоқ хўжалиги тармоқлари манфаат кўради. Еврокомиссия пресс-релизида айтилганидек, келишув кейинги ўн йил ичида ЕИнинг Австралияга экспортини 33 фоизга оширади. Австралия ҳукумати эса эркин савдо биринчи йилнинг ўзида мамлакатга 10 миллиард Австралия доллари, яъни тахминан 6 миллиард евро олиб келишини кутмоқда.

Савдо келишувидан ташқари, Брюссел ва Канберра янги мудофаа битими имзоланганини ҳам эълон қилди.

Австралия ҳукумати пресс-релизида айтилишича, бу соҳадаги шериклик “мудофаа саноати, киберхавфсизлик, иқтисодий хавфсизлик, терроризмга қарши кураш, нафратнинг барча шаклларига қарши туриш ва гибрид таҳдидларга қарши курашиш” бўйича ҳамкорликни ривожлантиришга хизмат қилади. Шу куни ЕИ ва Австралия хавфсизлик ва мудофаа шериклиги ҳақида ҳам расман эълон қилди.