Тошкентда ФВБнинг яна бир ходими тезкор тадбирда қўлга олинди

ФВБ инспектори Олмазор туманида жойлашган хусусий клиниканинг ёнғинга қарши ҳолати юзасидан ижобий хулоса олиб беришни ваъда қилиб, МЧЖ раҳбаридан 6,5 млн сўм олган. У ушбу пулларни қайтарган вақтда тезкор тадбирда ушланган.

Фото: ДХХ

Тошкент шаҳрида ФВБ инспекторининг ноқонуний ҳаракати фош этилди. Бу ҳақда Давлат хавфсизлик хизмати хабар берди.

Маълум қилинишича, Юнусобод туман ФВБ инспектори Олмазор туманида жойлашган хусусий клиниканинг ёнғинга қарши ҳолати юзасидан ваколатли ҳамкасблари орқали ижобий хулоса олиб беришни ваъда қилган. У бу “хизмати” учун феврал ойида МЧЖ раҳбаридан 6,5 млн сўм олган.

Бироқ, ФВБ инспектори турли баҳоналар билан ваъдасини бажармасдан келган. Шу сабабли, фуқаро ундан пулларини қайтаришни талаб қилган.

Давлат хавфсизлик хизмати ва прокуратура органлари ходимлари ҳамкорлигида ўтказилган тезкор тадбирда инспектор олган пулларини қайтариб берган вақтида ашёвий далиллар билан ушланган.

Унга нисбатан жиноят иши қўзғатилиб, қамоқ эҳтиёт чораси қўлланган. Ҳозирда тергов ҳаракатлари олиб борилмоқда.

Аввалроқ Янгиҳаёт тумани ФВБ кичик инспектори маҳаллий МЧЖ раҳбаридан 1,5 минг доллар олганда ушланганди.