Президент Кападзега қўнғироқ қилиб, футболчиларни мундиал йўлланмаси билан табриклади — видео

Шавкат Мирзиёев футбол бўйича Ўзбекистон миллий жамоаси бош мураббийи Тимур Кападзега қўнғироқ қилиб, ўз тарихида илк бор Жаҳон чемпионати йўлланмасини қўлга киритган футболчиларга табрик йўллади. Шунингдек, ФИФА президенти Жанни Инфантино ҳам ўзбекистонлик футболчиларни табриклади.

Президент Шавкат Мирзиёев футбол бўйича Ўзбекистон миллий жамоаси бош мураббийи Тимур Кападзега қўнғироқ қилиб, ўз тарихида илк бор Жаҳон чемпионати йўлланмасини қўлга киритган футболчиларни табриклади.

Аввалроқ, давлат раҳбари муқаддас Қурбон ҳайити кунларида халқимизга байрам совғаси сифатида олиб келаётган ушбу унутилмас тарихий ғалаба барчамизга муборак бўлсин, деб табрик сўзини йўллаган эди.

Шунингдек, ФИФА президенти Жанни Инфантино футбол бўйича Ўзбекистон жамоасини 2026 йилда Канада, Мексика ва АҚШда бўлиб ўтадиган ФИФА Жаҳон чемпионати тарихий йўлланмасини қўлга киритгани билан табриклади.

«Ўзбекистон ФИФАга 1994 йилда аъзо бўлганидан буён Олимпиада ўйинлари, ёшлар ўртасидаги бир нечта ФИФА мусобақаларида иштирок этиб, муносиб натижалар кўрсатиб келмоқда. Энди эса ажойиб саралаш босқичидан сўнг сизлар ҳақли равишда келаси ёзда ўтказиладиган мундиалда иштирок этиш имкониятига эга бўлдингиз. Дунё бўйлаб миллионлаб мухлислар «Оқ бўрилар»нинг жаҳон саҳнасидаги дебютини интиқлик билан кутишмоқда», — дейилади табрикда.

Футбол бўйича Ўзбекистон миллий жамоаси БАА билан сафарда дуранг қайд этиб, ўз тарихида илк бор мундиал йўлланмасини қўлга киритди. Ўзбекистон сафарда олинган 1 очко билан ўз ҳисобидаги очколарни 18 тага етказиб, гуруҳда 2-ўринни кафолатлади.

Шундай қилиб, Ўзбекистон 8-уринишда мундиал йўлланмасига эга чиқди. Энди миллий жамоа 2026 йилда АҚШ, Мексика ва Канада майдонларида ўтадиган жаҳон чемпионатида қатнашади.

Муаллиф: Фозилбек Юсупов

#Жанни Инфантино #Шавкат Мирзиёев