Украина Россиядаги темирйўлларга зарбаларни кўпайтирмоқда

Волгоград областида 4 августга ўтар кечаси Украина дронлари ҳужуми туфайли поездлар ҳаракати вақтинча тўхтатилди. Регион раҳбари Андрей Бочаровнинг маълум қилишича, Фролово шаҳридаги Арчеда станциясида темирйўлга дрон қулаган, у портламаган, воқеа жойига сапёрлар етиб борган.

Волгабўйи темирйўллари матбуот хизмати (Россия темирйўллари филиали) эса тунги соат 2:50 да Арчеда станциясида дрон парчалари қулаганини маълум қилди. Шу сабабли бешта йўловчи поезди, жумладан, Москва ва Санкт-Петербургдан келадиган поездлар, шунингдек, шаҳар атрофига қатнайдиган тўртта электричка кечиктирилган. Россия темирйўллари маълумотига кўра, поездлар беш соатдан кўпроқ вақтга кечиктирилган. Ҳаракат эрталаб соат 11:30 атрофида, яъни дронлар ҳужумидан саккиз соатдан кўпроқ вақт ўтгач тикланган.

Губернаторнинг сўзларига кўра, ҳужум оқибатида Арчеда станциясидаги техник бинода ёнғин содир бўлган, йўллар ва бошқа темирйўл инфратузилмасига зарар етмаган. Украинанинг Exilenova+ телеграм-канали учувчисиз учиш аппаратлари диспетчерлик станциясига ҳужум қилганини даъво қилмоқда. Канал шикастланган бинонинг суратини эълон қилди (очиқ манбалардан маълум бўлишича, сурат ҳақиқатан ҳам станция ҳудудида олинган, аммо гап диспетчерлик хонаси ҳақида кетаётгани аниқ эмас).

Сўнгги ҳафталарда Украина дронлари Россиядаги темирйўл объектларига бир неча бор ҳужум қилди. 19 июлдан бошлаб ярим ой ичида камида еттита шундай ҳужум содир бўлди (4 август ҳужумини ҳам қўшганда).

19 июл. Ростов области. Дрон бўлаклари қулаши оқибатида Лихая – Замчалово темирйўл перегонидаги алоқа тармоғи шикастланган. Лихая станцияси навбатчиси яраланган, жабрланувчи касалхонага ётқизилган. Поездлар ҳаракати тўхтатилди. 132 та йўловчи поезди 33 дақиқадан 15 соатгача кечикиб ҳаракатланган.

21 июл. Ростов области. Дронлар ҳужуми натижасида Каменоломни посёлкасидаги станция ҳудудида жойлашган бинода ёнғин чиқди. 50 дан ортиқ йўловчи поездлар йўналишга чиқиши кечиктирилган.

25 июл. Ростов области. Дрон парчалари Песчанокопская станциясига қулаб, контакт тармоғи ва станциядаги бино шикастланган. 10 та йўловчи поезди беш соатгача кечиктирилди.

25 июл. Краснодар ўлкаси. Тимашевск шаҳридаги вокзалда йўловчи поезди зарбага учради, икки киши жароҳат олди, улардан бири касалхонага ётқизилди. Поезд вагони ойналари синиб кетган. 12 та поезд қатнови кечиктирилган.

27 июл. Волгоград области. Октябрский посёлкасидаги Жутово станциясидаги электроподстанцияси ҳужумга учраган. Икки йўловчи поезд қатнови кечиктирилган, бир электричка қатнови бекор қилинган.

29 июл. Ростов области. Салскдаги вокзалга ҳужум қилинди. Йўловчи поездининг ойналари синган, ҳеч ким жабрланмаган. Юк состави ёниб кетган. Миналардан тозалаш пайтида икки сапёр ҳалок бўлган. Ҳаракат вақтинча тўхтатилган, 11 та поезд йўлга чиқиши кечиктирилган.

Бунгача июн ва июл ойларида дронлар темирйўлга деярли ҳужум қилмаган. Июл ойида фақат битта шундай ҳолат содир бўлди: 7 июл куни Воронеж областидаги ҳодиса туфайли поездлар кечиктирилди.

Бундан ташқари, май ойи охири ва июн ойи бошида темирйўлда камида бешта портлаш содир бўлди. Энг йирик ҳодиса 31 май куни кечқурун Брянск областида содир бўлган. У ерда йўловчи поезди ўтаётган автомобил кўприги қулаб тушган. Ўшанда етти киши ҳалок бўлган, 100 дан ортиқ киши жароҳатланган.