Россияда мактаб директори ота-оналарга мигрантлар туфайли ўзбек тилини ўрганишни таклиф қилди

Россиянинг Калининград шаҳри мактабларидан бирида директорнинг ўзбек тилини ўрганиш ҳақидаги таклифи можаро келтириб чиқарди.

Қайд қилинишича, 7-сон мактаб директори мигрантларнинг рус тилини деярли билмайдиган фарзандлари устидан шикоят қилган маҳаллий ота-оналарга ўзбек тилини мустақил ўрганишни маслаҳат берган. Шу сабабдан ота-оналардан бири ҳатто мигрантларга қарши позицияси билан танилган миллатчи ташкилот бўлмиш «Русская община»га шикоят қилган. Бироқ, бошқа она директорни ҳимоя қилиб, унинг сўзлари «контекстдан юлиб олинганини» айтди.

«Мамлакатда қонуний истиқомат қилувчи барча болалар таълим олиш ҳуқуқига эга. Ва уларни мактабга қабул қилмасликка ҳеч кимнинг ҳаққи йўқ. Албатта, битта синфда уларнинг сони унчалик кўп бўлмаслиги керак, лекин кўринишидан, бошқа иложи қолмаган. Балки бу директорнинг айбидир, билмайман. Людмила Николаевна шунчаки ота-оналарни ўзларини мигрант болаларнинг ўрнига қўйишга чақирди, чунки улар учун тил ўрганиш анча қийин, улар нотаниш тилда ўқиши керак. Ўзбек тилида бир неча сўз ўрганиб, уларга ёрдам беришимиз мумкинлигини ярим ҳазил қилиб айтди», деди она.

У шаҳарда кўпинча ўзини тажовузкор тутадиган мигрантлар билан боғлиқ муаммо борлигини тан олди, аммо аёлнинг сўзларига кўра, бунга «маҳаллий аҳолининг мигрантларни хуш кўрмаслиги» сабаб бўлган.