Амалдорлар даромадини декларациялаш қонунини муҳокамага қўйиш Адлия вазирлигига боғлиқ эмаслиги айтилди

Давлат хизматчиларининг активлари ва даромадларини декларациялаш янгиланган “Ўзбекистон – 2030” стратегиясига киритилмади. Аввалроқ Аксилкоррупция раҳбари Акмал Бурҳонов бу ҳақдаги қонун лойиҳаси такомилига етказилгани, уни жамоатчилик муҳокамасига чиқариш энди Адлия вазирлигига боғлиқлигини айтган эди. Вазир Акбар Тошқулов эса буни рад этди. Маълум қилинишича, regulation.gov.uz порталига НҲҲ лойиҳаларини масъул ташкилотнинг ўзи жойлайди.

Акбар Тошқулов / Фото: "Тараққиёт стратегияси" маркази

Ўзбекистонда узоқ йиллардан бери кутилаётган қонун – давлат хизматчиларининг мол-мулки ва даромадларини декларациялаш масаласи янгиланган “Ўзбекистон – 2030” стратегиясидан жой олмади. Бу масала янги стратегия тақдимотига бағишлаб 20 феврал куни ўтказилган матбуот анжуманида кўтарилди.

Коррупцияга қарши курашиш агентлиги 6 феврал куни Kun.uz мухбирининг саволига жавобан ушбу қонунни такомиллаштириш бўйича ишлар якунига етгани, энди уни муҳокамага чиқариш Адлия вазирлигининг вазифаси эканини айтганди.

Бироқ 20 феврал кунги матбуот анжуманида адлия вазири Акбар Тошқулов буни рад этди. Кейинроқ вазирлик вакилининг Kun.uz'га маълум қилишича, норматив-ҳуқуқий ҳужжатлар лойиҳаларини жамоатчилик муҳокамаси учун regulation.gov.uz порталига Адлия вазирлиги эмас, ҳужжат лойиҳасини ишлаб чиққан асосий ташкилотнинг бевосита ўзи жойлайди.

“Адлия вазирлиги regulation.gov.uz тизимини ишлаб чиққани учун, биз шунчаки ўртада воситачимиз холос. НҲҲ лойиҳаларини муҳокамага чиқариш ёки чиқармаслик бизнинг ваколатимиз эмас. Лойиҳа тизимга киритилса, автоматик чиқиб кетади”, – деди вазирлик вакили.

Матбуот анжуманида, шунингдек, Стратегик ислоҳотлар агентлиги директорининг биринчи ўринбосари Абдулла Абдуқодиров жисмоний шахслар даромадларини декларациялаш тартиби Солиқ кодексида аллақачон борлигини айтиб, давлат хизматчилари борасида алоҳида қонунга зарурат бор-йўқлигини савол остига олди.

“2019 йилда қабул қилинган янги Солиқ кодексида умумий декларация қилиш тартиби бор. Давлат ходимлари учун декларация қанчалик керак, билмадим. Ўйлайманки, ҳозир гап қонуннинг йўқлигида эмас, қонуннинг амалда қўлланмаслигида”, деди Абдуқодиров.

Эслатиб ўтамиз, Ўзбекистонда коррупцияга қарши умумэътироф этилган чоралардан бири – давлат хизматчиларининг мол-мулки ва даромадларини декларациялаш ҳамда жамоатчиликка очиқлаш масаласи расмийлар томонидан 2017 йилда кун тартибига қўйилган, аммо қатор ҳужжатларда белгилаб қўйилган муддатларга қарамай, тегишли қонунни қабул қилиш кечикмоқда.

2025 йил 21 апрелда имзоланган президент фармонига кўра, қонун лойиҳаси 2025 йил май ойида тайёр бўлиши керак эди.