Президент администрацияси ҳузуридаги Давлат резиденциялари дирекцияси янги лойиҳалар билан шуғулланади

Вазирлар Маҳкамасининг “Ўзбекистон Республикаси Президенти Администрацияси Молия-хўжалик департаментининг Давлат резиденциялари дирекцияси негизида иссиқхона, чорвачилик ва меҳмонхона комплексларини ташкил этиш чора-тадбирлари тўғрисида”ги қарори қабул қилинди.

Ҳужжат билан қайд этилишича, Ўзбекистон Республикаси Президенти Администрацияси Молия-хўжалик департаментининг Давлат резиденциялари дирекцияси ташкилотлари:

а) “Agro Service” давлат унитар корхонаси (лойиҳа ташаббускори) томонидан:

Ўзбекистон Республикаси Президенти Администрацияси Молия-хўжалик департаменти Давлат резиденциялари дирекциясининг Тошкент вилояти Қибрай туманида жойлашган ва помидор ҳамда бодринг етиштириш учун ойнали блокдан (3 га) иборат бўлган “Agro Service” ДУКнинг мавжуд иссиқхона-парник хўжалиги негизидаги иссиқхоналарни реконструкция қилиш;

“ECO” замонавий ихтисослаштирилган иссиқхона блоки (1,2 га) ва гул етиштириш учун иссиқхона блокини (0,5 га) ташкил этиш;

Тошкент вилоятида қорамоллар боқиш учун чорвачилик комплекси ва эчкиларни боқиш бўйича сут фермасини ташкил этиш;

б) “Turkiston mehmonxonalar kompleksi” давлат унитар корхонаси (лойиҳа ташаббускори) томонидан - Тошкент шаҳри, Юнус Ражабий кўчаси, 64-уйдаги мавжуд меҳмонхона биноларини реконструкция қилиш ва ресторан қуриш орқали халқаро стандартлар бўйича премиум-класс тоифасидаги меҳмонхона хизматлари кўрсатишни йўлга қўйган ҳолда, замонавий меҳмонхона комплексини ташкил этиш лойиҳалари амалга оширилмоқда.

Қайд этилган лойиҳаларни амалга ошириш доирасида:

а) Ўзбекистон Республикаси Президенти Администрацияси Молия-хўжалик департаментининг Давлат резиденциялари дирекцияси - буюртмачи;

б) “Bauraum Group” МЧЖ - бош пудратчи этиб;

в) қуйидагилар:

2019 йилда Ўзбекистон Республикасини ривожлантириш давлат дастури параметрларида назарда тутиладиган Ўзбекистон Республикаси Давлат бюджети маблағлари - “ECO” замонавий ихтисослаштирилган иссиқхона блоки ва гул етиштириш учун иссиқхона блокини ташкил этиш;

тижорат банкларининг кредитлари - Ўзбекистон Республикаси Президенти Администрациясининг Молия-хўжалик департаментининг Давлат резиденциялари дирекциясининг “Agro Service” ДУК иссиқхона-парник хўжалиги негизидаги иссиқхоналарини реконструкция қилиш, Тошкент вилоятида қорамоллар боқиш учун чорвачилик комплекси ва эчкиларни боқиш бўйича сут фермасини ташкил этиш, халқаро стандартлар асосида премиум-класс тоифасидаги меҳмонхона хизматлари кўрсатишни йўлга қўйган ҳолда замонавий меҳмонхона комплекси ташкил этиш бўйича молиялаштириш манбалари этиб белгиланди.

Тошкент вилояти ҳокимлиги:

қорамоллар боқиш учун чорвачилик комплекси ва эчкиларни боқиш бўйича сут фермасини қуришга ер участкалари, озуқа экинларини етиштириш, шунингдек, “ECO” замонавий ихтисослаштирилган иссиқхона блоки ва гул етиштириш учун иссиқхона блокини ташкил этишга зарур ер майдонлари ажратилишини;

Ўзбекистон Республикаси Ер ресурслари, геодезия, картография ва давлат кадастри давлат қўмитаси, Қишлоқ хўжалиги вазирлиги, «Ўзтрансгаз» ва «Ўзбекэнерго» акциядорлик жамиятлари, лойиҳа ташаббускорлари билан биргаликда Тошкент вилоятида қорамоллар боқиш учун чорвачилик комплекси ва эчкиларни боқиш бўйича сут фермасини, “ECO” замонавий ихтисослаштирилган иссиқхона блоки ва гул етиштириш учун иссиқхона блокини муҳандислик-коммуникация тармоқларига белгиланган тартибда улаш, шу жумладан энергия ресурсларининг зарур лимитлари ва суғориш учун сув таъминоти ҳажмлари ажратилишини таъминлайди.