Йирик ва мегалойиҳалар учун параллел экспертиза амалиёти йўлга қўйилади

Президент қарорига мувофиқ, мазкур тартиб лойиҳаларни кўриб чиқиш муддатларини қисқартириш ва ҳужжатларни тайёрлаш жараёнини янада самарали ташкил этишга хизмат қилади. Шу билан бирга, агар тақдим этилган лойиҳа илгари Марказда экспертизадан ўтган лойиҳага ўхшаш бўлса, Марказ таклифи асосида унинг лойиҳаолди ҳужжати тезлаштирилган тартибда экспертизадан ўтказилади.

Шу санадан бошлаб Марказ томонидан лойиҳаолди ҳужжатларни ишлаб чиқувчи лойиҳа институтлари ва ташкилотлари рейтинги ҳам юритилади. Унда улар комплекс экспертиза натижаларига қараб “юқори”, “ўрта” ва “паст” ишончлилик даражаларига ажратилади. Рейтинг электрон платформага жойлаштирилиб, доимий янгилаб борилади.

Янги тартибга кўра, ўрта, йирик ва мегалойиҳалар учун лойиҳа ташкилотларини танлашда энди фақат “энг арзон нарх” мезонига таянилмайди. Бунда “сифат, тажриба ва нарх” мезони мажбурий тартибда қўлланади. Шунингдек, лойиҳа ташкилотлари ҳамда ташаббускор буюртмачиларга нисбатан рағбатлантириш чоралари жорий этилиши назарда тутилган.