Трамп Венгрияда Путин билан учрашишини эълон қилди

Оқ уй раҳбарининг таъкидлашича, мулоқот жуда самарали бўлди.

«Мен ҳозиргина Россия президенти Владимир Путин билан телефон орқали мулоқотимни якунладим ва бу жуда самарали бўлди. Президент Путин мени ва Қўшма Штатларни Яқин Шарқда юз йиллар давомида орзу қилинган Тинчликнинг буюк ютуғи билан табриклади. Аслида, Яқин Шарқдаги Муваффақият Россия/Украина билан урушни тугатиш бўйича музокараларимизга ёрдам беришига ишонаман», деб ёзди Трамп.

Унинг таъкидлашича, Путин биринчи хоним Меланияга [украиналик] болалар тақдири билан шуғулланаётгани учун миннатдорчилик билдирди.

«У жуда миннатдор бўлди ва бу давом этишини айтди. Биз, шунингдек, Украина билан уруш тугагач, Россия ва АҚШ ўртасидаги савдо ҳақида кўп гаплашдик», деб ёзди Трамп.

Оқ уй раҳбарининг таъкидлашича, келаси ҳафтада АҚШ-Россия олий даражадаги маслаҳатчилар учрашуви бўлиб ўтади.

«Суҳбат якунида биз келгуси ҳафта Олий даражадаги маслаҳатчиларимизнинг учрашуви бўлиб ўтишига келишиб олдик. Қўшма Штатларнинг дастлабки учрашувларини Давлат котиби Марко Рубио бошқа турли одамлар билан биргаликда олиб боради. Учрашув жойи аниқланиши керак», деб ёзди Трамп.

АҚШ президенти Венгрия пойтахти Будапештда Путин билан учрашишини ҳам эълон қилди.

«Кейин президент Путин ва мен келишилган жойда, Венгриянинг Будапешт шаҳрида учрашиб, Россия ва Украина ўртасидаги бу «шармандали» урушга чек қўя оламизми ёки йўқлигини кўриб чиқамиз. Президент Зеленский ва мен эртага Овал кабинетда учрашамиз, у ерда президент Путин билан суҳбатимизни ва бошқа кўп нарсаларни муҳокама қиламиз. Бугунги телефон орқали мулоқотда катта силжиш бўлди, деб ўйлайман», деб ёзди Трамп.