Мумбайда шамол туфайли улкан билборд қулади. 14 киши ҳалок бўлган

Ҳиндистоннинг Мумбай шаҳрида улкан реклама лавҳаси қулаши оқибатида камида ўн тўрт киши вафот этиб, 60 га яқин киши жароҳатланган. Маҳаллий расмийлар улкан билборд ноқонуний ўрнатилганини маълум қилган.

13 май куни Мумбайнинг Гаткопар туманида 70 га 50 метр ҳажмидаги билборд турар жой биноси ва ёнилғи қуйиш станцияси устига қулаб тушган, бу вақтда шаҳарга кучли ёмғир ва қум бўрони ёпирилганди.

BBC News хабарига кўра, кучли шамол дарахтларни илдизидан қўпориб ташлаб, йўлларда тартибсизлик юзага келтирган, электр таъминотида узилишлар келиб чиққан.

Воқеа жойида олинган кадрларда реклама конструкцияси шамол таъсирида силкингани, кейин эса қурилиш, одамлар ва станцияда турган машиналар устига қулагани акс этган.

Расмийлар хабарига кўра, қутқарув амалиётига полициячилар, ўт ўчирувчилар ва табиий офатлар оқибатларини бартараф этиш бўйича жамоалар жалб этилган.

Маҳаллий расмийлар билборд ҳажми рухсат берилганидан бир неча бор катта экани ва реклама агентлиги уни ноқонуний ўрнатганини маълум қилган. Компания шаҳардаги шу каби барча реклама тахталарини олиб ташлаш ва конструкцияларни демонтаж қилиш бўйича кўрсатма олган.

Times of India нашри аниқлик киритишича, компания тегишли органлар рухсатини олмасдан жами саккизта реклама лавҳаси ўрнатган. Қулаб тушган конструкция вазни 250 тоннани ташкил этган.