Эронлик футболчилар Миноб қурбонларини хотирлади

Эрон миллий жамоаси Туркиянинг Белек шаҳрида Нигерия миллий жамоасига қарши ўтказилган ўртоқлик учрашуви олдидан акция ўтказишди. Форс футболчилари майдонга бинафшаранг ва пушти аралаш оч қизил рюкзакларни кўтариб чиқишди ва миллий мадҳия ижро этилаётганида уларни кўтариб туришди.

Бу орқали футболчилар АҚШ ва Исроилнинг Эронга қарши урушининг илк кунида Миноб шаҳридаги Шажарайи Тоййиба номли қизлар мактабига йўлланган зарба қурбонларини ёд этишди. 28 феврал куни ушбу мактабга ракета келиб тушиши оқибатида 170 дан ортиқ киши ҳалок бўлган, уларнинг аксари ўқувчилар эди.

Эрон футбол федерацияси вице-президенти Муҳаммад Наби бундай акция ўтказиш ташаббуси футболчиларнинг ўзидан чиққани, улар бу орқали қизларнинг оила аъзоларига ҳамдардлик изҳор этишни исташганини қайд этган.

АҚШ ҳарбийлари мактабга хатолик туфайли зарба йўллаганди. Бу хатолик амалиётда эскирган разведка маълумотларидан фойдаланилгани туфайли рўй берган. Аммо ҳозирча АҚШ томони буни расман тан олмаган ва фақат ҳолат юзасидан текширув ўтказилаётганини маълум қилиш билан чекланмоқда.