Минобдаги мактабга зарба қурбонлари сони 150 га яқинлашгани маълум қилинди

Исроил қизлар мактабига 28 феврал тонгида ракета зарбаси йўллаган, қурбонларнинг аксари мактаб ўқувчилари бўлгани айтилмоқда.

Фото: Ali Najafi / ISNA / AFP / Scanpix / LETA

Эрон прокуратураси томонидан келтирилган сўнгги маълумотларга кўра, мамлакат жанубидаги Миноб шаҳрида қизлар учун мактабга Исроил томонидан йўлланган зарба оқибатида ҳалок бўлганлар сони 148 кишини ташкил этмоқда, яна 95 киши турли даражада тан жароҳатлари олишган. Бу ҳақда Tasnim агентлиги 1 март куни хабар тарқатди.

Миноб округи прокурорига кўра, ҳалок бўлганларнинг аксарияти – шу мактаб ўқувчилари бўлишган. Шунингдек, қурбонлар орасида ўқитувчилар ҳамда ўқувчиларнинг ота-оналари бор.

Исроил мактабга 28 феврал тонгида ракета зарбаси йўллаган.

Маълумотларга кўра, Минобда Ислом инқилоби муҳофизлари корпуси базаларидан бири жойлашган.

АҚШ ва Исроил 28 феврал куни Эронга қарши уруш бошлади. Биринчи куни бутун Эрон бўйлаб ҳарбий объектлар зарба остида қолган. Мамлакат раҳбариятининг қатор юқори мартабали шахслари, жумладан, диний раҳнамо Али Хоминаий ҳам ҳалок бўлган. Бунга жавобан Эрон қуролли кучлари Исроилга ва Американинг Яқин Шарқдаги базаларига ҳужумлар уюштирди.

Тайёрлаган Азиз Қаршиев

#Эрон #Исроил #Миноб

Эрон ядро дастури бўйича музокаралар самарасиз тугаши ортидан, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди. Эроннинг жавоб зарбалари АҚШнинг Яқин Шарқдаги базалари ва Исроил ҳудудларига қаратилди. Минтақадаги қатор шаҳарларда дронлар ёки ракеталар қулаши кузатилди.