Роналду Саудияда бойкот бошлади

Саудия Арабистони футболида навбатдаги муаммо юзага келди. Карим Бензема «Ал-Иттиҳод»ни можаро билан тарк этиши ортидан «Ан-Наср» ҳужумчиси Криштиану Роналду ҳам бойкот эълон қилди.

Роналду жамоасининг навбатдаги ўйинида иштирок этмоқчи эмаслиги ҳақида бир кун олдин маълум бўлганди. A Bola хабарига кўра, 40 ёшли форвард Саудия Арабистони Суверен фонди (PIF) стратегиясидан норози – ушбу фонд мамлакатдаги қатор йирик клубларни, жумладан, «Ан-Наср», «Ал-Иттиҳод» ва «Ал-Ҳилол»ни ҳам бошқаради. Криштианунинг фикрича, фонд кўпроқ рақобатчиларни, жумладан,  «Ал-Ҳилол»ни қўлламоқда.

Бундан ташқари, журналист Яғиз Сабунжиўғлининг маълумотига кўра, Карим Бензема «Ал-Иттиҳод»дан «Ал-Ҳилол»га ўтиши ҳам Роналдуни норози қилган – португалиялик футболчи буни «ҳалол рақобатга зарба» деб баҳоламоқда.

«Ан-Наср»нинг 2 феврал оқшомида «Ар-Риёз»га қарши ўйини қайдномаси эълон қилингач, олдинроқ тарқалган хабарлар тасдиқланди: Криштиану қайдномага ҳам киритилмаганди. Шу билан бирга, инсайдер Фабрицио Романо унда ҳеч қандай жароҳат ёки таътил олишга зарурат бўлмаганини айтиб чиқди.

Роналдунинг хавотирларини тушуниш мумкин: «Ал-Ҳилол» – унинг жамоасининг чемпионлик йўлидаги асосий рақобатчиси ҳисобланади, бу жамоа 19 турда 47 очко тўплаган. «Ал-Наср» бир очколик фарқ билан таъқиб этмоқда, бу вазиятда ўтган мавсум тўпурарларидан бири бўлган Бензема (21 гол) ушбу жамоа сафига ўтиши эса рақибнинг имкониятларини оширади.

Роналду 2023 йилда Саудия футболини танитиш мақсадида олиб келинган, шу билан бирга, унга катта ваъдалар берилган, хусусан, жамоасига бошқа юлдуз футболчилар билан ҳам кучайтирилиши айтилганди.

Аммо ўтган давр ичида «Ан-Наср»дан кўра «Ал-Иттиҳод» ва «Ал-Ҳилол»га кўпроқ эътибор қаратилиб, асосий юлдузлар шу жамоаларга олиб келинди ва айнан шу жамоалар асосий кубокларни қўлга киритди, Роналду эса ҳалигача бирорта жиддий соврин юта олгани йўқ.

Роналдунинг бойкоти «Ан-Наср»даги илк норозилик ҳаракати эмас. Январ ойи ўрталарида жамоа бош мураббийи Жорже Жезуш унинг ҳозирги клуби «„Ал-Ҳилол“ каби сиёсий ҳокимиятга эга эмаслиги» ҳақида гапирганди. Эътиборли жиҳати, у олдинроқ айнан «Ал-Ҳилол»ни бошқарганди. Унинг бу сўзлари катта шов-шув келтириб чиқарди, «Ал-Ҳилол» эса уни олти ойдан бир йилгача муддатга дисквалификация қилишни талаб қилди.

«Ан-Наср» ва «Ал-Ҳилол»нинг сўнгги йиллардаги харажатлари

Бундай хабарлардан кейин айрим рақамларни таққослаб кўриш мумкин. «Ал-Ҳилол» таркиби (Бенземанинг трансферигача) қиймати ҳозирда 190 млн еврога, «Ан-Наср»ники – 133 млн еврога баҳоланади. Роналду Саудия клубига 2022 йил 31 декабрда келганди. Шундан кейинги даврда бу икки жамоа трансферлар учун қуйидагича маблағлар сарфлаган:

2023/2024 йиллар мавсумида «Ал-Ҳилол» трансферлар учун бошқа клубларга 376,1 млн евро ўтказиб берган, 2024/2025 йиллар мавсумида бу кўрсаткич – 102,95 млн еврони, жорий мавсумда – 145,01 млн еврони ташкил этмоқда. Кўрсатилган даврдаги жами харажат – 624,06 млн евро.

«Аль-Наср» эса 2023/2024 йиллар мавсумида – 164,01 млн, 2024/2025 йиллар мавсумида – 140,35 млн, 2025/2026 йиллар мавсумида – 104,97 млн евро ишлатган. Якуний рақам – 409,33 млн евро. Бундан келиб чиқадики, жамғарма «Ан-Наср»нинг таркибини кучайтиришга рақобатчисиникига қараганда 200 млн евро камроқ маблағ ажратган.

Бу оралиқда «Ал-Наср»нинг даромади: 1,52 млн + 20,12 млн + 11,65 млн = 33,29 млн евро. «Ал-Ҳилол»да бу рақамлар шундай кўринишда: 1,38 млн + 14,85 млн + 11,52 млн = 27,75 млн евро. Бундан келиб чиқадики, «Ан-Наср» трансферлар учун камроқ харажат қилганига қарамай, бироз кўпроқ маблағ ишлаб топган.

Шу қишда ҳам «Ан-Наср» Ироқдан 21 ёшли Ҳайдар Абдулкаримни сафига қўшиб олиш билан чекланди. «Ал-Ҳилол» эса янги футболчилар учун яна 44 млн евро ишлатди. Шундан 30 млн евро «Ренн»нинг 18 ёшли ҳужумчиси Қодир Мейте учун сарфланган.

Аммо асосий гап бутунлай бошқа рақамларда. Роналду Саудия Арабистонига келганидан буён унинг жамоаси бирорта расмий кубокни қўлга киритмади. «Ал-Ҳилол» эса бу даврда мамлакат чемпиони, Саудия Арабистони кубогининг икки карра ғолиби, мамлакат Суперкубогининг  икки карра эгасига айланди. Жами бешта соврин. Бу эса Криштианунинг норозилигига асос борлигини кўрсатмоқда.