Ҳужумчи Криштиану Роналду бойкотини тўхтатиб, «Ан-Наср» сафида феврал ойи бошидан буён илк бор майдонга тушди. Унинг йўқлигида жамоа учта ўйинда ҳам ғолиб чиққанди, у билан бу серия давом этди.
«Ал-Фотиҳ» – «Ан-Наср» 0:2
Голлар: Криштиану Роналду, 18 (0:1). Яҳё, 78 (0:2)
«Ал-Фотиҳ»: Пачеко, Саадан, Ал-Сувалим, Фернандеш, Маъсуд (Ал-Зубайди, 68), Юссуф, Делгадо, Баатиа (Ал-Сарнуҳ, 90+1), Бендебка (Ал-Фаваз, 90+1), Варгас, Батна
«Ан-Наср»: Бенту, Симакан, Ал-Амри, Иниго Мартинес (Ал-Шарарий, 90+6), Ал-Ғаннам (Ал-Бушал, 86), Брозович, Ал-Ҳайбари (Ал-Ҳассан, 75), Мане (Яҳё, 75), Коман, Жоау Феликс, Криштиану Роналду (Ал-Ҳамдон, 90+7)
Огоҳлантиришлар: Маъсуд, 64 – Ал-Ҳайбари, 49. Иниго Мартинес, 88
Ғалаба голи
Унинг қайтиши лига турнир жадвалининг 10-ўрнида бораётган «Ал-Фотиҳ»га қарши сафар ўйинига тўғри келди. Криштиану бошланғич таркибда майдонга тушди ва 18-дақиқадаёқ Садио Маненинг узатмасини голга айлантирди.
Бу гол Роналду учун жорий мавсумдаги 18-гол бўлди ва у чемпионатнинг энг яхши тўпурарлари пойгасида учинчи ўринда бормоқда. Биринчи ўринда «Брентфорд»нинг собиқ ҳужумчиси, ҳозирда «Ал-Аҳли»да тўп сураётган Айвен Тоуни 20 гол билан пешқадамлик қилмоқда.
Бундан ташқари, Роналду фаолиятидаги жами голлари сонини 962 тага етказди ва минглик довон сари юришини давом эттирди.
«Ан-Наср» мухлислари эса португалиялик футболчининг демаршидан хафа бўлишмаганини кўрсатишди – ўйиндан олдинги чигалёзди машғулотлари чоғида уни фаоллик билан қўллаб-қувватлаб туришди. Уларнинг кўпчилиги Криштиану бу забастовкани клуб манфаатлари учун уюштирган, деб ҳисоблашади.
Забастовка сабаблари
Бунга Роналдунинг «Реал»даги собиқ жамоадоши Карим Бенземанинг трансфери сабаб бўлганди. Чемпионат пешқадами ва «Ан-Наср»нинг олтин медаллар учун курашдаги асосий рақобатчиси «Ал-Ҳилол» қишки трансферларнинг сўнгги кунида уни «Ал-Иттиҳод»дан сотиб олганди.
Португалиялик футболчи эса мамлакатдаги асосий етакчи клубларни, жумладан, «Ал-Ҳилол», «Ал-Иттиҳод» ва «Ан-Наср»ни бошқарувчи Саудия Арабистони Суверен фонди (PIF) олиб бораётган сиёсат унинг жамоаси чемпион бўлишига халал бермоқда, деб ҳисоблайди. Криштианунинг фикрича, фонд кўпроқ рақобатчиларга ёрдам бермоқда. Журналист Яғиз Сабунжиўғлининг ёзишича, 41 ёшли форвард Каримнинг трансферидан норози бўлган – у буни «ҳалол рақобатга зарба» деб қабул қилган.
