“Жиддий маъмурий ислоҳотлар бўлмаса, муаммо такрорланади” – Ҳамид Содиқ

Қонундан ташқари ротациялар ҳам тизимдаги кучни баланслайди, аммо жараён шаффоф бўлиши керак, деб ҳисоблайди сиёсий таҳлилчи Ҳамид Содиқ. У куни кеча президент бошчилигида ИИВда амалга оширилган лавозимлар алмашинуви билан боғлиқ вазиятнинг моҳиятини тушунтиришга уринди. “Мутлақ муҳокама қилинмайдиган шундай бир тизим яралди, мана шундан воз кечилгани ижобий ҳолат бўлди”, дейди у Kun.uzʼга берган интервюсида.

Kun.uzʼнинг 27 январ куни президент Шавкат Мирзиёев бошчилигида пойтахтда хавфсиз муҳитни шакллантириш ва жамоат хавфсизлигини таъминлаш масалаларига бағишланган видеоселектор йиғилиши таҳлилига бағишланган суҳбатида сиёсатшунос Ҳамид Содиқ ҳам иштирок этиб, карт-бланшлар билан боғлиқ олдинги ва бугунги вазиятни тушунтиришга уринди. Таъкидланишича, аввалги кучишлатар тизимларнинг ваколати “ўлим жазоси”га ҳам қарор чиқариб, ижро этишига олиб келган.

“Ҳатто шундай даражага етдики, бу тизимнинг ичидаги ҳозир ўқишни битириб келган лейтенантнинг ҳам жойлардаги қарори муҳокама қилинмас эди. Яъни мутлақ муҳокама қилинмайдиган шундай бир тизим яратди. Ҳа, 10-15 йил жиноятчиликни камайтириб, бир барқарорликни вужудга келтирар, лекин бу тизим тизимлашганидан кейин ҳатто саройга хавф сола бошлаганидан кейин ҳам тўхтатиб бўлмай қолади. Ва нафақат, дейлик, атрофдагилар, балки мана шу гўштқиймалагич ўзининг ходимларини ҳам тортиб кетганини кўрдик кейинчалик. Ўзининг яратган гўштқиймалагичи ўзларини ҳам тортиб кетди ва шунинг учун бу бутун тизимни жудаям ёмон аҳволга олиб келиб қўйди, мана шундан воз кечилгани ижобий ҳолат бўлди”, - дейди у.

Сиёсий таҳлилчи бугунги ҳолатда қонундан ташқари ротациялар тизимни балансга келтиришини, масалан, кучишлатар тизимлар кучайиб кетиб қолмай, балки бюрократик бошқа тизимлар унга баланс бераётганини, аммо бу жараёнлар шаффоф бўлиши тарафдори эканини қайд этди.

“Парда ортида кечаётгани учун бизда маълумот йўқ ҳозир. Нима учун олиб ташланди? Ўзи асли сабаби нима эди? Нима учун биз муҳокама қила олмаяпмиз, деган масалалар кейинчалик Абдураҳмон акам айтмоқчи бўлган нарса, жудаям катта ваколатлар кимда тўпланади? Агар бундай ҳолат давом этадиган бўлса, кучишлатар тизимларнинг қайсидир тури кучайиб кетадиган бўлса, яна олдинги ҳолатга келишимиз мумкин. Шунинг учун бу мана шунақа қатъий бир қарор билан жиддий маъмурий ислоҳотларни талаб қиладиган жараён ҳисобланади. Агар шуни амалга оширмайдиган бўлса, айнан бу жараён мен уч ой демаган бўлардим, олти ой, бир йилнинг ичида яна такрорланиши мумкин”, - дейди Ҳамид Содиқ.

Шунингдек, интервюда ИИВ тизими борасида ҳукуматнинг кейинги қадамлари қандай бўлиши кераклиги, кадрлар сиёсати, парламент каби сиёсий институтларни “тирилтириш” масалалари ҳам муҳокама қилинди. Видеонинг тўлиқ шаклини шу ҳавола орқали томоша қилишингиз мумкин.