Қимматга тушган липосакция: блогерни кимлар операция қилди?

Instagram’да Кокош тахаллуси билан танилган 33 ёшли блогер аёл Тошкентдаги "Меd Consultant" клиникасида ўтказилган операциядан сўнг оғир аҳволга тушиб қолди. Kun.uz вазиятга ойдинлик киритиш мақсадида бемор ва унинг яқинлари билан боғланди.

{Yii::t(}

Ўтказиб юбориш 6s

Ўтказиб юбориш

Instagram’да Кокош тахаллуси билан танилган 33 ёшли блогер Комила Абдуқодирова Тошкентдаги Меd Consultant клиникасида ўтказилган операция оқибатида оғир аҳволга тушиб қолгани ҳақидаги хабарлар ижтимоий тармоқларда муҳокамаларга сабаб бўлмоқда.

Бу липосакция ва абдоминопластика операцияси жараёнида педиатр, стоматолог ва тажрибасиз талаба иштирок этгани айтилди. Бир ойдан буён давом этиб келаётган, уч маротаба қайтадан жарроҳлик амалиёти ўтказилган вазиятда беморга касаллик тарихи очилмагани иддао қилинмоқда. Kun.uz вазиятга ойдинлик киритиш мақсадида бемор ва унинг яқинлари билан боғланди.

“Мен ҳам билмай қолдим, чиқаётган маълумотлар мана шу 25 кун давомида бўлган ҳолатлар. Мен бу жароҳатни гематома деб ўйлаганман, менга шундай айтишган. Таниш шифокорлар бунинг некроз (тирик организмдаги ҳужайраларнинг нобуд бўлиши) эканлигини айтишди. Шундай кейин бўлган жанжаллар инфекция тушмаслиги учун аппаратни қўйиш учун эди. Афсуски бу аппарат ҳам 4 соатдан бери ишламаяпти”, - деди Комила Абдуқодирова.

Комиланинг қариндоши Ниҳола Ражабовага кўра, беморнинг бундан кейинги реабилитацияси учун клиника ёрдам беришни истамаяпти:

“Операция жараёнида 2-курс талабаси, ҳеч қандай ҳужжати йўқ ординатор Достон ҳам иштирок этган. Операция 8 соат давом этган. Шифокорнинг қон босими ошиб операцияга қатнаша олмасдан стоматолог шифокорни таклиф қилган экан. Унинг ҳеч бир ҳужжати ва бу клиника билан шартномаси бўлмаган. Яъни бу клиникада ишламайдиган шифокор ва шогирдлари – талабалар операция қилган бўлиб чиқди.

Ҳаттоки жағини операция қилишганда жароҳат етказиб қийшайтириб қўйишган, ҳозир гапирганда қийналяпти.

Малакаси, тажрибаси йўқ шифокорлар синглимизни оғир аҳволга келтириб қўйган. Комиланинг рекламалари ортида клиникага келган қиз 20 млн пул тўлаб операция қилдирган, аммо шифокорлар унга бу операцияни YouTube каналидан кўриб, биринчи марта қилаётганни айтишган.

Синглимнинг оёққа туриб кетиши учун анча муддат керак экан, клиника эса ёрдам беришни ҳохламаяпти. Бу ерда санитария қоидаларига умуман риоя қилинмас экан. Афсуски шифокорлар оғир ҳолатдаги беморнинг олдида қўлида сигарет билан кириб ўтиришади”, - дейди у.

Меd Consultant хусусий клиникаси бу амалиётни бепул ўтказганини, юзага келган ҳолат эса беморнинг операциядан кейинги тавсияларга риоя қилмаганлиги оқибатида келиб чиққанини маълум қилган. Клиникадан изоҳ олишнинг имкони бўлмади. Чунки у ерда Соғлиқни сақлаш тизими масъуллари ва прокуратура органлари текшируви кетаётган экан. Шу сабаб ичкарига киришга ҳеч кимга рухсат беришмади.

Айтиш керакки, сўнгги вақтда Ўзбекистонда абдоминопластика операцияси оммалашмоқда. 2020-2023 йиллар оралиғида пластик хирургия соҳасидаги бундай операциялар сони Ўзбекистонда 30-40% га ошган. Айрим тиббий клиникалар фаолияти ўрганиб чиқилганда ҳафтасига 3-4 маротаба шундай амалиётлар ўтказилаётгани маълум бўлди.

Эслатиб ўтамиз, 2024 йилнинг декабрь ойида 45 ёшли актриса Ҳалима Ибрагимова ҳам шундай операциядан кейин вафот этган эди.