Атлантика океанидаги кемада ҳантавирус инфекцияси оқибатида 3 киши ҳалок бўлди

ЖССТ Атлантика океанида сузаётган круиз кемасида ҳантавирус эпидемияси тарқалишини текширмоқда. Расмийлар инфекция оқибатида уч киши вафот этгани ва яна уч киши касалланганини маълум қилди.

«MV Hondius» қутб экспедицияси кемаси / Фото: Getty Images

Нидерландияда жойлашган «Oceanwide Expeditions» компанияси ўз баёнотида Атлантика океанида – Африканинг ғарбидаги Кабо-Верде яқинида жойлашган «MV Hondius» қутб экспедицияси кемасидаги «жиддий тиббий вазият» ҳақида хабар берди.

Reuters нашрининг ёзишича, кема тахминан уч ҳафта олдин Аргентинадан 150 га яқин йўловчи билан йўлга чиққан. У Кабо-Верде йўлида Антарктида ҳамда бошқа ҳудудларда ҳам тўхтаган.

Жаҳон соғлиқни сақлаш ташкилоти кемада ҳантавирус инфекцияси лаборатория таҳлиллари орқали тасдиқланганини маълум қилди. ЖССТ ҳозирда эпидемияни ўрганмоқда. Агентликнинг маълум қилишича, лаборатория тестлари олти кишидан бирида ҳантавирус мавжудлигини тасдиқлаган.

Касалланган олти кишининг уч нафари вафот этган, бир бемор Жанубий Африкадаги шифохонада реанимацияда қолмоқда. Вафот этган икки киши Нидерландия фуқароси бўлган, ЖАРда даволанаётган бемор эса Британия фуқароси.

«ЖССТ аъзо давлатлар ва кема операторлари ўртасида касаллик аломатлари бўлган икки йўловчини тиббий эвакуация қилиш, шунингдек, жамоат саломатлиги хавфини тўлиқ баҳолаш ва бортдаги қолган йўловчиларга ёрдам кўрсатиш бўйича мувофиқлаштириш ишларига кўмаклашмоқда», дейилади ташкилот хабарида.

«Oceanwide Expeditions» компаниясининг билдиришича, Кабо-Верде расмийлари тиббий ёрдамга муҳтож йўловчиларнинг қирғоққа тушишига рухсат бермаган. Нидерландия ҳукумати эса касаллик белгилари бўлган икки йўловчини ва вафот этган йўловчининг жасадини ватанига қайтариш чораларини кўришга уринмоқда.

DW нашрининг ёзишича, ЖАР расмийлари Йоханнесбургда касалланган йўловчилар билан алоқада бўлган шахслар занжирини қидирмоқда.

Ҳантавирус қандай касаллик?

Ҳантавирус – кемирувчиларнинг ахлати ва пешоби ҳаво орқали тарқалиши натижасида – масалан, сичқонлар яшаган жойлар тозаланганда юқиши мумкин. ЖССТнинг қайд этишича, камдан кам ҳолларда вирус одамдан одамга ҳам ўтиши мумкин.

Касаллик гриппга ўхшаш белгилар билан бошланиб, юрак ва ўпка етишмовчилигига олиб келиши мумкин. АҚШ Касалликларни назорат қилиш маркази маълумотларига кўра, ҳолатларнинг қарийб 40 фоизи ўлим билан тугайди.

Ҳантавирусни даволаш учун махсус дори воситалари йўқ. Шунинг учун муолажалар – қўллаб-қувватловчи терапияга, жумладан, оғир ҳолатларда беморларни ўпканинг сунъий вентиляцияси қурилмаларига улашга қаратилган.

Британия ташқи ишлар вазирлиги ва Жанубий Африка соғлиқни сақлаш департаменти ҳозирча ушбу вазият бўйича изоҳ бермади.